Şweýsariýada ýerleşýän Halkara sport gözlegleri merkezi (CIES) dünýäniň iň iri sanly platformalarynda futbol komandalarynyň resmi hasaplarynyň meşhurlygyna bagyşlanan täze seljeriş hasabatyny çap etdi. Hünärmenler Facebook, Instagram, TikTok, X we YouTube ýaly esasy durmus ulgamlaryny göz öňünde tutup, klublaryň internet auditoriýasynyň germini öwrendiler. Statistiki maglumatlaryň netijelerine görä, Ispaniýanyň «Real Madrid» topary bütin dünýäde janköýerleriň iň köp yzarlaýan sport brendi boldy.

Patyşalyk klubunyň dürli internet platformalaryndaky resmi hasaplaryna ýazylan adamlaryň umumy sany 487,6 milliona ýetdi. Sanawyň ikinji ornunda hem başga bir ispan grandy bolan «Barselona» ýerleşip, onuň sanly giňişlikdäki auditoriýasy 441,8 million ulanyjy bilen kesgitlenildi. Dünýäniň iň meşhur üçlügini bolsa Angliýanyň «Mançester Ýunaýted» topary jemleýär. Bu iňlis klubunyň yzarlaýjylarynyň sany 238,6 million adama deň bolup, ol reýtingiň liderinden tas iki esse yza galýar.

Çap edilen dünýäniň iň meşhur 20 futbol guramasynyň sanawynda Ýewropanyň öňdebaryjy çempionatlarynyň wekilleri agdyklyk edýär. Reýtingde dördünji orundan onunjy orna çenli degişlilikde «Pari Sen-Žermen» (208,1 mln), «Mançester Siti» (187,8 mln), «Liwerpul» (179,2 mln), «Ýuwentus» (178,3 mln), «Bawariýa» (165,2 mln), «Çelsi» (156,5 mln) we «Arsenal» (118,5 mln) ýaly toparlar ornaşdylar. Olaryň yzy bilen sanawda «Tottenhem» (112,2 mln), «Atletiko Madrid» (91,4 mln) hem-de Italiýanyň «Inter» (82,7 mln) we «Milan» (81 mln) klublary gelýär.

Şol bir wagtda seljerijiler Ýewropa sebitinden daşardaky toparlaryň hem durmuş ulgamlaryndaky işjeňliginiň ýokarlanandygyny hasaba aldylar. Sanawyň ilkinji ýigrimiligine Braziliýanyň «Flamengo» (71,6 mln), Saud Arabystanynyň «Al-Nasr» (66 mln), Müsüriň «Al-Ahli» (60,1 mln) we Türkiýäniň «Galatasaraý» (54,6 mln) toparlary girmegi başardy. Iň meşhur ýigrimi klubyň sanawyny 43,4 million yzarlaýjy bilen Italiýanyň «Roma» topary jemleýär. Dünýä belli ýyldyzlaryň çykyş edýän Amerikanynyň «Inter Maýami» kluby bolsa bu gezekki sanawda 21-nji ýerde galyp bildi.