Golliwudyň iki meşhur wekili — Kwentin Tarantino we Silwestr Stallone birleşip, alty bölümden ybarat boljak täze we özboluşly taslamany taýýarlaýarlar. TMZ neşiriniň habar bermegine görä, bu täze serial tomaşaçylary XX asyryň 30-njy ýyllaryna, ýagny "köne Golliwudyň" dowruna alyp gider. Taslamanyň esasy aýratynlygy — onuň şol döwrüň hakyky atmosferasyny bermek üçin ak-gara görnüşde we şol wagtky kameralar arkaly surata düşürilmegidir.

Serialyň sýužeti 1930-njy ýyllaryň Amerikasynyň durmuşyny janlandyrar. Onuň merkezinde şol döwre mahsus bolan gangsterler, restranlardaky tansçy gyzlar, boks bäsleşikleri we özboluşly saz medeniýeti ýerleşer. Silwestr Stallone bu taslamada diňe režissýor hökmünde çykyş edip, özi ekranda görünmez. Häzirki wagtda aktyorlar düzüminiň saýlanyp alynmagy we surata düşüriş meýilnamalarynyň jikme-jiklikleri dowam edýär.

Şol bir wagtda Kwentin Tarantino diňe bu serial bilen çäklenmän, eýsem teatr dünýäsine hem gadam basmaga taýýarlanýar. Onuň ýazan täze pýesasynyň Londonyň meşhur West-End teatrlarynda sahnallaşdyrylmagyna garaşylýar. Bu teatr taslamasynyň premýerasy 2027-nji ýylyň başyna meýilleşdirilip, režissýoryň döredijiliginiň täze taraplaryny açyp görkezer diýlip garaşylýar.

Iki ussadyň bilelikdäki işi kinosöýüjileriň arasynda uly gyzyklanma döretdi. Köne kinonyň tehniki we medeni aýratynlyklaryny häzirki zaman tejribesi bilen utgaşdyrjak bu serial, taryhy dramalaryň muşdaklary üçin hakyky sowgat bolar. Taslamanyň haçan ekrana çykjakdygy we beýleki jikme-jiklikleri ýakyn wagtda mälim ediler.