Russiýanyň parlamenti bolan Döwlet Dumasynda raýatlaryň şahsyýetnamasyny çalyşmagyň tertibine täze üýtgetme girizmek baradaky başlangyç öňe sürüldi. Täze teklibe görä, Russiýanyň raýatlary 60 ýaşlary dolanda pasportlaryny gaýtadan täzelemeli bolarlar. Dumanyň deputaty Igor Antropenkonyn sözlerine görä, bu çäre ýurtda adamyň ortaça ömür dowamlylygy 74,2 ýaşa çenli ýokarlanandygy sebäpli zerurlyk bolup durýar.

Häzirki wagtda Russiýada pasportlar iň soňky gezek 45 ýaşda çalşylýar we şondan soňra resminama möhletsiz hasaplanýar. Emma hünärmenler adamyň daş keşbiniň 45 ýaşdan 60 ýaşa çenli bolan aralykda uly özgermelere sezewar bolýandygyny belleýärler. Bu ýagdaý bolsa, aýratyn-da, aeroportlarda, demir ýol menzillerinde ýa-da banklarda şahsyýeti anyklamak işlerini kynlaşdyrýar.

Teklip edilýän täze düzgün raýatlaryň resminamasyndaky suratynyň olaryň hakyky keşbi bilen laýyk gelmegini üpjün etmäge gönükdirilendir. Deputat 60 ýaşda pasportyň täzelenmeginiň dürli hyzmatlar alnanda ýüze çykyp biljek düşünişmezlikleriň öňüni aljakdygyny nygtady. Bu başlangyç raýatlara edilýän hyzmatlaryň hilini we howpsuzlygyny ýokarlandyrmaga ýardam eder.

Ýatladyp geçsek, häzirki wagtda Russiýanyň kanunçylygy raýatlara 14, 20 we 45 ýaşlarda pasportlaryny çalyşmagy borçly edýär. Täze teklibiň kabul edilen ýagdaýynda, 60 ýaş hem bu sanawa goşular. Häzirki wagtda bu mesele degişli komitetlerde hünärmenleriň we kanunçykaryjylaryň arasynda ara alnyp maslahatlaşylýar.