Türkmenistanyň Prezidenti Serdar Berdimuhamedow Filippinler Respublikasynyň Prezidenti Ferdinand Markosa ýurduň Mindanao adasynda ýüze çykan, köp sanly adam pidalaryna, şikes ýetmelere we uly weýrançylyklara getiren güýçli ýertitreme zerarly çuňňur gynanç hatyny iberdi. Döwlet Baştutanymyzyň bu haty türkmen halkynyň we döwletiniň agyr pursatda Filippinleriň halky bilen durnukly raýdaşlygynyň subutnamasy boldy.

Milli Liderimiz şu agyr we pajygaly pursatda gurban bolanlaryň maşgalalaryna, dogan-garyndaşlaryna hem-de ähli ýakynlaryna Türkmenistanyň halkynyň, Hökümetiniň adyndan we hut öz adyndan çuňňur gynanjyny hem-de medet beriji sözlerini ýollady. Şeýle-de, ýurduň Ýolbaşçysy tebigy apatyň netijesinde dürli derejede ejir çeken we şikes alan raýatlaryň tiz wagtda sagalmaklary baradaky dileglerini hem-de arzuwlaryny beýan etdi.

Filippiniň wulkanologiýa we seýsmologiýa institutynyň resmi hasabatyna görä, duşenbe güni irden Mindanao adasynyň günortasynda ýerleşýän Sarangani welaýatynda we onuň golaýyndaky çäklerde güýji 7,8 magnituda barabar bolan örän weýrançylykly ýertitreme hasaba alyndy. Respublikanyň Raýat goranyş müdiriýetiniň iň soňky beren takyk maglumatlaryna görä, wepat bolanlaryň sany 45 adama ýetdi, 630 adam dürli şikesler aldy we 17 sany raýat bolsa häzirki wagtda dereksiz ýitenleriň sanawynda galýar. Apat sebitinde halas ediş çäreleri dowam edýär.