Aşgabat şäheriniň güni mynasybetli paýtagtymyzyň Berkararlyk we Bagtyýarlyk etraplarynda döwrebap ýaşaýyş jaý toplumlary dabaraly ýagdaýda açyldy. Durmuş maksatly binalaryň açylyş dabaralaryna ýaşulular, mährem eneler, jemgyýetçilik guramalarynyň we köpçülikleýin habar beriş serişdeleriniň wekilleri, talyplar hem-de paýtagtymyzyň ýaşaýjylary gatnaşdylar. Şatlykly pursatlar medeniýet we sungat ussatlarynyň, çagalar döredijilik toparlarynyň joşgunly çykyşlary bilen utgaşdy. Şeýle hem gurluşykda tapawutlanan işgärlere döwlet Baştutanymyzyň adyndan gymmat bahaly sowgatlar gowşuryldy.

Berkararlyk etrabynyň 8-nji kiçi etrapçasynda 5 gatly 60 öýli we 5 gatly 80 öýli döwrebap binalar açylyp, bagtyýar maşgalalara täze öýleriň açarlary gowşuryldy. Ýaşaýyş jaýlarynyň otaglary, eýwanlary we aşhanalary kämil durmuş tehnikalary hem-de ýokary hilli mebeller bilen doly üpjün edildi. Jaýlaryň daş-töwereginde çagalaryň oýun meýdançalary we dabaralary geçirmek üçin ýörite desgalar guraldy.

Bagtyýarlyk etrabynyň «Çoganly» ýaşaýyş toplumynda bolsa 2 gatly, 5 otagly 78 sany kottej görnüşli ýaşaýyş jaýy ilatyň ulanmagyna berildi. Bu jaýlar ýerli howa şertlerine we ekologik kadalara laýyk gelýän ýokary hilli gurluşyk serişdeleri gurlup, olaryň töwereginde bagy-bossanlyk emele getirildi. Döwrebap ýol-ulag we inženerçilik düzüminden başga-da, ilaty gündelik harytlar bilen üpjün etmek maksady bilen, bu ýerde täze iki sany söwda we hyzmatlar öýi işe girizildi.