Oýun sanawy
Ioniýa deňzinde ajaýyp halas ediş çäresi: Salwadorly zenan 20 sagatlap suwda galyp, aman saklandy
13 Okt. 12:11Gresiýanyň kenar gorag gullugy Ioniýa deňzinde syýahat gämisinden suwa böken 44 ýaşly zenany halas etmek boýunça ajaýyp çäräniň tamamlanandygyny habar berdi. «Royal Caribbean» kompaniýasynyň «Odyssey of the Seas» diýen uly kruiz gämisinde barýan salwadorly syýahatçy zenan Zakinf adasynyň günorta-günbatarynda gäminiň üstünden deňze böküpdir. Ol özüniň bu geň hereketini çaltrak kenara çykmak islegi bilen düşündiripdir.
Gözleg-halas ediş gulluklary tarapyndan derew giň göwrümli gözleg işleri başlatdy. Ýerli kenar gorag gullugynyň wekilleri ilki suwuň ýüzünde agdarylyp ýatan halas ediş halkasyny tapmagy başardylar. Deňizde dowam eden hyzmatdaşlyk netijesinde, Madeýra baýdagynyň astynda ýüzüp barýan «MSC Rossella III» atly ýük gämisiniň ekipažy şol halkanyň içinde suwda ýüzüp ýören zenany görüp, ony derrew gäminiň üstüne çykardylar.
Deňizde takmynan 20 sagatlap duran hem-de sowuk suwa garşy durmagy başaran zenana gämide derrew ilkinji lukmançylyk kömegi berildi. Soňra ol kenar gorag gullugynyň ýörite gämisi arkaly hassahana gyssagly ýerleşdirildi. Lukmanlar halas edilen raýatyň saglyk ýagdaýynyň durnuklydygyny we onuň өmri üçin howpuň ýokdugyny tassykladylar.
Şeýle hem okanyň
Günorta afrikaly ýazyjy emeli aňyň kömegi bilen 370-den gowrak kitap neşir edip, 1 million dollar gazandy
24 Okt. 13:11Koral Hart lakamy bilen tanalýan günorta afrikaly ýazyjy soňky 20 aýyň dowamynda emeli aň ulgamlarynyň kömegi bilen 371 sany kitaby ýazyp, neşir etmegi başardy. Yerli «EWN» radiosynyň habar bermegine görä, öň 14 ýyllap neşirýat ulgamynda zähmet çeken awtor 2025-nji ýylyň fewralynda emeli aň teknolojialaryny özleşdirip, gysga wagtyň içinde doly derejeli romanlary döretmäge mümkinçilik berýän hususy ulgamyny işläp düzdi. Ýazyjy her bir eseriň sýužetini, stiline hem-da каarakterlerini özi kesgitläp, emeli aňa meýilnama berýär, alnan garalama bolsa jemleýji tapgyrda awtor tarapyndan redaktirlenýär.
Täze romany döretmek üçin emeli aňa bary-ýogy 45 minut töweregi wagt gerek bolup, taýýar tekst iki gezek neýroulgamdan geçirildikden soň adam tarapyndan okalyp, neşire taýýarlanýar. Awtor öz kitaplarynyň 1 milliondan gowrak nusgasyny satmagy başardy we 2026-njy ýylda 1 million dollardan gowrak peýda gazandy. Ýazyjynyň emeli aň bilen bilelikde döreden söýgi romanlarynyň biri hatda «Amazon» platformasynyň iň geçginli 100 bestselleriniň hataryna girmegi başardy.
Häzirki wagtda Koral Hart öz eserlerini sanly, çap edilen we audio formatlarda okyjylara hödürleýär hem-da özüni täjirçilik edebiýatynda täze eýýamyň düýbüni tutujy hökmünde görkezýär. Şeýle hem ol emeli aňdan peýdalanmak ýoly bilen kitap ýazmak dyesinde beýleki awtorlar üçin «Authorythm» diýlip atlandyrylýan ýörite programma üpjünçiligini taýýarlaýar. Bu täsin tejribe edebiýat äleminde emeli aňyň amaly mümkinçilikleriniň täze sahypasyny açdy.
Blitz