Türkmenistanyň gündogar sebitinde ýerleşýän iri sement zawody 2026-njy ýylyň ilkinji üç aýynyň dowamynda önümçilik meýilnamasyny artygy bilen ýerine ýetirdi. Hasabat döwründe kärhananyň kuwwatlyklary 406 müň tonna golaý ýokary hilli sement öndürmäge mümkinçilik berdi. Bu görkeziji geçen ýylyň degişli döwri bilen deňeşdirilende, ösüş depgininiň durnuklydygyny we önümçilik göwrüminiň 35 müň tonna töweregi artandygyny tassyklaýar.

Kärhananyň tehnologik taýdan kämilleşdirilmegi netijesinde önümçiligiň ösüş depgini 9,5 göterime deň boldy. Bu sanlar zawodyň diňe bir içerki bazaryň isleglerini kanagatlandyrman, eýsem sebitiň gurluşyk düzüminiň ösmegine hem saldamly goşant goşýandygyny görkezýär. Häzirki wagtda zawodda halkara standartlaryna laýyk gelýän gurluşyk materiallarynyň dürli görnüşleri yzygiderli öndürilýär.

Geçen 2025-nji ýyl kärhananyň taryhynda iň netijeli ýyllaryň biri hökmünde hasaba alyndy. Şonda zawodyň birinji we ikinji tapgyrlarynyň bitewi utgaşykda işlemegi netijesinde, ýyllyk önümçilik 1,5 million tonnadan geçdi. Bu netijeli tejribe 2026-njy ýylda hem dowam etdirilip, zawodda önümçilik kuwwatlyklaryny doly ulanmak we zähmet öndürijiligini ýokarlandyrmak boýunça yzygiderli çäreler amala aşyrylýar.

Döwrebap enjamlar we awtomatlaşdyrylan ulgamlar bilen üpjün edilen bu senagat desgasy ýurduň ykdysady kuwwatyny berkitmekde strategik ähmiýete eýedir. Hünärmenleriň hünär derejesiniň ýokarlanmagy we çig mal serişdeleriniň netijeli ulanylmagy zawodyň geljekde hem täze önümçilik sepgitlerine ýetmegine şert döredýär. Şu ýylyň ilkinji çärýeginde gazanylan üstünlikler ýyllyk meýilnamalaryň üstünlikli berjaý ediljekdigine ynam döredýär.