Amerikanyň Birleşen Ştatlarynyň «NUBURU» we Italiýanyň «SunCubes» kompaniýalary suwuň astynda lazer şöhleleriniň üsti bilen simsiz energiýa geçirmek baradaky täze taslamanyň üstünde işläp başladylar. Döredilýän tehnologiýa awtonom suwasty apparatlary, ýörite datçikleri we aragatnaşyk enjamlaryny hiç hili kabel birikdirmesiz elektrik energiýasy bilen üpjün etmäge şert döreder.

«DEEP LIGHT» diýlip atlandyrylan bu taslama ýokary kuwwatly lazer şöhlelendirijisini hem-de gelýän ýagtylygy guralyň işlemesi üçin zerur bolan tok güýjüne öwürýän kabul ediji moduly öz içine alýar. Inženerler geljekde göni gatnaşyksyz, onlarça metr aralyga çenli durnukly energiýa akymyny amala aşyrmagy maksat edinýärler.

Ulgamyň esasy aýratynlygy — suw gurşawynda beýleki şöhlelere garanyňda has gowy aralaşýan we az ýitgi çekýän gök hem-de gök-ýaşyl spektrli lazerleriň ulanylmagydyr. Taslamanyň optiki bölegini döretmek «NUBURU» kompaniýasynyň düzümindäki «Lyocon S.r.l.» kärhanasyna ynanyldy. Täze çözgüt häzirki wagtda diňe öz akkumulýatoryna bagly bolan we ýörite stansiýalara gaýdyp gelmeli bolýan suwasty robotlaryň awtonom iş möhletini düýpli artdyrmaga mümkinçilik berer. Häzirki wagtda taslama ilkinji taýýarlyk tapgyrynda bolup, hünärmenler synag işlerine taýýarlyk görýärler.