Keniýa ýeňil atletika boýunça uly ýaşly türgenleriň arasyndaky dünýä çempionatyny kabul etjek ilkinji Afrika ýurdy bolar. Bu taryhy halkara ýaryşy 2029-njy ýylda geçirilip, bäsleşikleri ýurduň paýtagty Naýrobi şäherindäki 48 müň tomaşaçy üçin niýetlenen «Kasarani» stadionynda geçirmek meýilleşdirilýär.

Ýaryşy geçirmek hukugy ugrunda Naýrobiden başga-da London we Rim şäherleri bäsleşdi, emma olar Keniýadan ýeňildiler. Şol bir wagtyň özünde, 2031-nji ýyldaky dünýä çempionatyny geçirmek hukugy Germaniýanyň Mýunhen şäherine berildi. Ýatladyp geçsek, Keniýa ozal 2025-nji ýyldaky çempionaty geçirmäge hem dalaş edipdi, emma şonda infrastruktura sebäpli bu hukuk Tokio şäherine berilipdi.

Keniýanyň saýlawdaky esasy artykmaçlyklarynyň biri ýurduň baý atletika däpleri boldy. Gündogar Afrika döwleti dünýä çempionatlarynda 72 medal, Olimpiýa oýunlarynda bolsa 38 altyn medal gazandy. Naýrobiniň dalaşgärligini öňe sürmek işine marafonda iki gezek Olimpiýa çempiony we 2003-nji ýyldaky dünýä çempiony Eliud Kipçoge hem bürünip gatnaşdy. «World Athletics» guramasynyň prezidenti Sebastian Kou Naýrobiniň dalaşgärligini örän täsirli diýip häsiýetlendirdi.

Mundan başga-da, ýurduň iri ýeňil atletika ýaryşlaryny geçirmek boýunça toplanan tejribesi uly rol oynady. Naýrobide 2017-nji ýylda 18 ýaşa çenli, 2021-nji ýylda bolsa 20 ýaşa çenli türgenleriň arasynda dünýä çempionatlary geçirildi. 2007-nji ýylda bolsa Mombasada kross boýunça dünýä çempionaty guralypdy.

Häzirki wagtda Keniýa Tanzaniýa we Uganda bilen bilelikde geçirjek Afrikanyň Milletler kubogy futbol ýaryşynyň öňüsyrasynda sport desgalarynyň durkuny täzeleýär. Şol taýýarlyk işleriniň çäklerinde «Kasarani» stadionynda hem giň gerimli gurluşyk we durkuny täzeleme işleri amala aşyrylýar.