Ýaponiýanyň hökümeti Ýakyn Gündogarda dörän durnuksyzlygyň netijesinde energiýa serişdeleriniň nyrhlarynyň ýokarlanmagyna garşy Aziýa sebitiniň ýurtlaryna goldaw bermek başlangyjyny öňe sürdi. Premýer-ministr Sanae Takaiti tarapyndan yglan edilen bu taslama laýyklykda, nebitiň durnukly üpjünçiligini üpjün etmek we sebit ykdysadyýetini goramak üçin 10 milliard dollar möçberinde maliýe serişdesi gönükdiriler. Bu goldaw esosan energiýa üpjünçilik zynjyrlaryny kämilleşdirmäge we sebitdäki strategik ätiýaçlyklary artdyrmaga niýetlenendir.

Maliýe kömegi baradaky kararyň kabul edilmegine Günorta-Gündogar Aziýa döwletleri bileleşiginiň (ASEAN) agzalarynyň gatnaşmagynda geçirilen onlaýn maslahat itergi berdi. Bellenilen serişdeler diňe bir nebit satyn almaga däl, eýsem nebitönümleriniň ätiýaçlyk gorlaryny giňeltmäge we bu ugurdaky infratüzümi berkitmäge sarp ediler. Ýaponiýanyň seljermelerine görä, bu maliýe kömegi ASEAN ýurtlarynyň bir ýyllyk nebit importynyň göwrümine deň bolan takmynan 1,2 milliard barrel nebite barabar gelýär.

Ýaponiýanyň bu başlangyjy diňe bir ynsanperwer ýa-da ykdysady kömek däl-de, eýsem özüniň milli bähbitlerini hem göz öňünde tutýar. Sanae Takaitiniň belleýşi ýaly, Ýaponiýanyň ykdysadyýeti we senagaty Aziýa bazarlary bilen berk baglanyşyklydyr. Sebitdäki islendik energiýa çökgünligi ýa-da nebit üpjünçiligindäki bökdençlikler göni we gytaklaýyn görnüşde Ýaponiýanyň önümçilik we durmuş ulgamlaryna ýaramas täsirini ýetirip bilýär.

Taslamanyň durmuşa geçirilmegi bilen sebitde energiýa howpsuzlygy täze derejä çykar diýlip garaşylýar. Ýaponiýa bu ädimi arkaly Aziýa sebitinde özüniň strategik hyzmatdaşlygyny has-da berkitmegi we global bazarlardaky nyrh oýnaklamalaryna garşy durnukly goranyş mehanizmini döretmegi maksat edinýär. Bu serişdeleriň paýlanylyşy we degişli taslamalaryň utgaşdyrylyşy ýakyndaky hökümetara gepleşikleriň esasy mowzugy bolar.