2026-njy ýylyň 26-njy martynda Aşgabadyň döwrebap «Arçabil» myhmanhanasynda Türkmenistanyň Garaşsyzlygynyň şanly 35 ýyllygy mynasybetli «Ynsanperwerlik ýoly» atly halkara maslahat dabaraly ýagdaýda geçirildi. Bu maslahat ýurduň halkara ynsanperwerlik gatnaşyklaryndaky ornuny has-da berkitmek we dünýä jemgyýetçiligi bilen tejribe alyşmak maksady bilen guraldy. Çärä Türkmenistanyň Gyzyl Ýarymaý Milli jemgyýetiniň (TGÝMJ), Halkara Gyzyl Haç Komitetiniň we Gyzyl Ýarymaý jemgyýetleriniň halkara federasiýasynyň ýokary derejeli wekilleri gatnaşdy.

Maslahatyň dowamynda sanly ulgam arkaly daşary ýurtlaryň Gyzyl Ýarymaý Milli jemgyýetleriniň wekilleri hem özara hyzmatdaşlygyň möhüm meselelerine goşuldylar. Gatnaşyjylar ynsanperwer guramalarynyň arasyndaky gatnaşyklaryň häzirki ýagdaýyny we geljegini ara alyp maslahatlaşdylar. Şeýle halkara duşuşyklaryň diňe bir döwletara gatnaşyklary däl, eýsem meýletinçileriň we hünärmenleriň bilim derejesini ýokarlandyrmaga, täze iş usullaryny öwrenmäge ýardam edýändigi aýratyn bellenildi.

Çykyşlarda Türkmenistanyň halkara giňişliginde parahatçylyk söýüjilik, hoşniýetli goňşuçylyk we ynsanperwerlik ýörelgelerini öne sürmekde tutýan strategik ornuna aýratyn üns berildi. TGÝMJ-niň alyp barýan işleriniň dolulygyna özygtyýarlylyk, bitaraplyk we meýletinlik ýörelgelerine esaslanýandygy nygtaldy. Türkmenistanyň ynsanperwerlik kömeklerini bermekde we sebitde durnuklylygy saklamakda bitirýän hyzmatlary halkara bilermenleri tarapyndan ýokary baha mynasyp boldy.

Maslahatyň ahyrynda gatnaşyjylar çäräniň ýokary derejede guralandygy we ynsanperwerlik ugrunda döredilen mümkinçilikler üçin Türkmenistanyň Prezidenti Serdar Berdimuhamedowa hem-de Milli Lider, Halk Maslahatynyň Başlygy Gurbanguly Berdimuhamedowa tüýs ýürekden minnetdarlyk bildirdiler. Olar öne sürlen täze başlangyçlary häzirki döwrüň talaplaryna laýyklykda durmuşa geçirmek we dünýäde ynsanperwerlik gymmatlyklaryny dabaralandyrmak üçin ähli tagallalary etjekdiklerine ynandyrdylar.