Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Hytaý Halk Respublikasyndan dolanyp gelýärkä, Gazagystan Respublikasynyň çäkleriniň üstünden uçup geçdi. Milli Liderimiz uçaryň penjiresinden goňşy ýurduň täsin tebigat gözelligini, bahar paslynda göm-gök öwüsýän uç-gyraksyz sähralaryny we daglaryny höwes bilen synlady. Bu täsirli pursatlarda Gahryman Arkadagymyz Gazagystanyň Prezidenti Kasym-Žomart Tokaýewe dostlukly we doganlyk duýgularyna ýugrulan ýörite hat ýollady.

Milli Liderimiz öz hatynda gazak halkynyň beýik şahyry Abaý Kunanbaý oglunyň bahar paslyny wasp edýän ajaýyp goşgy setirlerini ýatlady. Tebigatyň oýanyşyny we günüň mährini wasp edýän bu setirler arkaly Gurbanguly Berdimuhamedow iki goňşy halkyň arasyndaky taryhy we medeni umumylygy ýene-de bir gezek nygtady. Hatta beýan edilen bu setirler türkmen we gazak halklarynyň köpasyrlyk dostluk hem-de doganlyk gatnaşyklarynyň sarsmazdygynyň özboluşly nyşanyna öwrüldi.

Şeýle hem, Türkmenistanyň Halk Maslahatynyň Başlygy öz hatynda Gazagystanyň häzirki wagtda amala aşyrýan möhüm strategik reformalaryna we syýasy özgertmelerine ýokary baha berdi. Ol Prezident Kasym-Žomart Tokaýewiň ýurduň halkynyň abadançylygyny üpjün etmek we döwlet gurluşyny pugtalandyrmak ugrundaky tagallalaryna doganlyk goldawyny beýan etdi. Şu baharyň Gazagystan üçin täzelenişiň, agzybirligiň we uly ýeňişleriň bahary boljakdygyna berk ynam bildirdi.

Hatynyň ahyrynda türkmen halkynyň Milli Lideri Gazagystanyň Baştutanyna berk jan saglyk, döwlet işlerinde uly üstünlikler, doganlyk gazak halkyna bolsa egsilmez bagtyýarlyk, parahatçylyk we gülläp ösüş arzuw etdi. Bu diplomatik ädim iki ýurduň arasyndaky ýokary derejeli özara ynamyň we hoşniýetli goňşuçylyk gatnaşyklarynyň täze belentliklere göterilýändiginiň aýdyň subutnamasydyr.