Google kompaniýasy Android operasion ulgamly smartfonlaryň öndürijiligini ýokarlandyrmaga we batareýasynyň işleýiş wagtyny uzaltmaga gönükdirilen düýpli kämilleşdiriş işlerini geçirýär. Bu maksat bilen Android LLVM toolchain platformasyny we Automatic Feedback-Directed Optimization (AutoFDO) diýlip atlandyrylýan döwrebap tehnologiýany ulanmak meýilleşdirilýär. Täze ulgam smartfonlaryň diňe bir çalt işlemegini däl, eýsem energiýany has tygşytly ulanmagyny hem üpjün eder.

Android smartfonlary gündelik durmuşda hemişelik usulda köp sanly fon amallaryny we programmalary ýerine ýetirýärler, bu bolsa enjamlaryň prosessoryna uly agram salýar. AutoFDO tehnologiýasy programma kodunyň nähili ýerine ýetirilýändigini jikme-jik seljerýär we bu gymmatly maglumatlary kompilýatora berýär. Netijede, ulgam programmalaryň iň köp ulanylýan ýollaryny we amallaryny öňünden saýlap, prosessoryň artykmaç agramyny ep-esli derejede azaltmaga kömek edýär.

Google-yň resmi habarynda bellenilişi ýaly, programma üpjünçiliginiň standart toplumynda kompilýator müňlerçe ownuk we çylşyrymly çözgütleri kabul etmeli bolýar. AutoFDO tehnologiýasy kompilýatory dolandyrmak üçin kody ýerine ýetirmegiň real durmuşdaky ssenarilerini ulanmak arkaly bu ýagdaýy düýpli üýtgedýär. Bu bolsa enjamyň emeli aň ýaly akylly usulda işlejekdigini we ulanyjynyň endiklerine görä uýgunlaşjakdygyny aňladýar.

Kompaniýanyň geçiren deslapky synaglaryna görä, täze tehnologiýa netijesinde operasion ulgamyň ýükleniş wagty 2,1% gysgaldy, programmalaryň «sowuk» tertipde, ýagny täzeden işe düşmegi bolsa 4,3% çaltlandy. Bu tehnologiýa Android ýadrosynyň iň soňky wersiýalarynda we täze nesil smartfonlarda peýda bolar. Bu bolsa Android ulanyjylaryna has oňaýly, çalt we batareýasy uzak wagtlap saklaýan enjamlary ulanmaga mümkinçilik berer.