Bütindünýä Saglygy Goraýyş Guramasy (BSGG) häzirki wagtda dünýäniň 23 döwletinde ýüze çykarylan Covid‑19 ýokanjynyň täze görnüşine degişli maglumatlary seljerýär. Ylmy taýdan BA.3.2 diýlip atlandyrylan bu ştamm eýýäm Demirgazyk Amerikanyň, Aziýanyň we Ýewropanyň birnäçe ýurtlarynda resmi taýdan hasaba alyndy. Saglygy goraýyş hünärmenleri wirusyň ýaýraýyş gerimine we onuň üýtgemelerine berk gözegçilik edýärler.

«Sikada» diýlip atlandyrylýan bu täze görnüşiň özboluşly aýratynlygy bar. Bilermenleriň düşündirişine görä, bu ştamm edil sikada mör-möjegi ýaly, uzak wagtlap hiç hili işjeňlik görkezmän, "ukuly" ýagdaýda galypdyr we soňra birden ýüze çykyp başlapdyr. Häzirki wagtda Keselleriň gözegçiligi we öňüni almak boýunça merkezler wirusyň täze ojaklaryny we onuň mutasiýa aýratynlyklaryny öwrenmek işlerini dowam etdirýärler.

Häzirki wagta çenli toplanan maglumatlar bu görnüşiň öňki ştammlardan has howpludygyny tassyklamaýar. Emma lukmançylyk jemgyýetçiligini alada goýýan esasy mesele, bu ýokanjyň has ýaş nesillere, esasan hem çagalara täsir etme mümkinçiligidir. Şol sebäpli BSGG bu görnüşi "gözegçilik astyndaky" sanawa girizdi we ähli ýurtlaryň saglygy goraýyş ulgamlaryna seresaplylygy saklamagy maslahat berýär.

Hünärmenler BA.3.2-niň dünýä saglygy goraýyş ulgamyna ýetirip biljek täsirini anyklamak üçin laboratoriýa barlaglaryny alyp barýarlar. Wirusyň ýaýraýyş tizliginiň we immun ulgamyna bolan täsiriniň öwrenilmegi, geljekde öňüni alyş çäreleriniň dogry meýilleşdirilmegine ýardam berer. Halkara derejesindäki seljermeler ýokanjyň täze tolkunynyň öňüni almak üçin möhüm ähmiýete eýedir.