Dünýä belli «Maşa we Aýy» animasion taslamasynyň awtorlarynyň biri bolan Oleg Kuzowkow bu meşhur gahrymanlaryň gatnaşmagynda täze doly göwrümli filmiň dörediljekdigini mälim etdi. Halkara metbugat serişdeleriniň habar bermegine görä, bu başlangyç taslamanyň ösüşinde täze döwri açar. Täze filmde asyl nusgadaky gülküli pursatlar we özboluşly äheňler saklanyp, gahrymanlar tomaşaçylara has kämil we täzeçe görnüşde hödürlener.

Täze kino eseriniň 2028-nji ýylyň ahyryna çenli taýýar edilmegi meýilleşdirilýär. Döredijilik topary häzirki wagtda filmiň ssenarisi we şekillendiriş aýratynlyklary üstünde işleýärler. Bu taslama diňe bir çagalara däl, eýsem uly ýaşly tomaşaçylara hem niýetlenip, onuň dünýä prokatynda uly gyzyklanma döretjekdigine garaşylýar. Filmiň surata düşürilmegi bilen meşhur gahrymanlaryň başdan geçirmeleri has giň gerime eýe bolar.

«Maşa we Aýy» multfilmi ilkinji gezek 2009-njy ýylda ekrana çykyp, gysga wagtyň içinde halkara derejesinde meşhurlyk gazandy. Bu multserial häzirki güne çenli Ýewropanyň, Amerikanyň we Ýakyn Gündogaryň onlarça döwletinde teleýaýlymlar arkaly görkezilip gelýär. Onuň dünýäniň dürli künjeklerindäki tomaşaçylar tarapyndan gyzgyn garşylanmagy, gahrymanlaryň dil we medeni päsgelçilikleri ýeňip geçmegi başarandygyny görkezýär.

Täze doly göwrümli taslama animasion seriýalaryň dowamy bolup, ol brendiň dünýä bazaryndaky ornyny has-da berkitmäge gönükdirilendir. Beýik Britaniýa, Germaniýa, Fransiýa we Italiýa ýaly ýurtlaryň kinoteatrlarynda we telekanallarynda bu filme uly isleg bildiriljekdigi şübhesizdir. Doly göwrümli film tomaşaçylara öz söýgüli gahrymanlary bilen has uzak wagtyň dowamynda gyzykly wagt geçirmäge mümkinçilik berer.