Türkiýe Respublikasynda Türkmenistanyň köpçülikleýin habar beriş serişdeleriniň wekilleri üçin guralan halkara metbugat sapary dowam edýär.

Bu giň gerimli media-taslama Türkiýäniň Syýahatçylygy ösdürmek we wagyz etmek agentligi (TGA) tarapyndan guralyp, oňa ýurdumyzyň öňdebaryjy döwlet we hususy neşirleriniň žurnalistleri gatnaşýar.

Gözel Balykesir sebitinde başlanan saparyň ilkinji günlerinde türkmen wekiliýeti Manastyr Çaýy çeşmesine, meşhur Zeýtun ýagynyň muzeýine bardy we Güre kenarýakasynda gezelenç etdi.

Žurnalistler bu ýerde Egeý kenarýakasynyň esasy medeni we millî gymmatlyklarynyň biri bolan zeýtun önümçiliginiň asyrlyk taryhy bilen ýakyndan tanyşdylar.

Saparyň dowamynda Kazdaglary (İda dagy) milli parkyna guralan jip-safari gezelenji gatnaşyjylarda uly täsir galdyrdy. Wekiliýet agzalary Şahindere kanyonynyň ajayyplygyny, buz ýaly tebigy çeşmeleri synladylar hem-de sebitiň Manzarasy açylýan rowaýaty Zews ybadathanasyna (Altar of Zeus) bardylar.

Media-saparyň üçünji günü Çanakgala welaýatyna geçmek we antik taryh bilen tanyşmak bilen dowam etdi. Žurnalistler Egeý deňzine ajaýyp manzarasy açylýan beýik gaýada ýerleşýän Assos antik şäherine we Afina ybadathanasyna baryp gördiler. Agşamara bolsa wekiliýet Çanakgala şäheriniň merkezine gelip, kenarýaka boýunça gezelenç etdi we meşhur Troýa atyny synlady.

Metbugat saparynyň öňümizdäki günlerinde žurnalistleri rowaýaty Troýa şäherçesi we onuň zamanabap muzeý toplumy, Tewfikiýe arheo-obasy, şeýle hem Çanakgala şehitleriniň hatyra toplumy we Gallipoli taryhy meýdançasy bilen tanyşlyk garaşýar.