Internet äleminde dünýä belli rus matematigi Grigoriý Perelmanyň durmuş ýoluna bagyşlanan «Witrindäki nusga» («Витринный экземпляр») atly täze çeper filmiň ilkinji resmi treýleri köpçülige görkezildi. Kinoda baş keşbi tanymal ýaş aktýor Mark Eydelşteýn janlandyrýar. Film 2000-nji ýyllaryň başynda bütin adamzat taryhynda iň çylşyrymly hasaplanan we «müňýyllygyň ýedi meselesiniň» biri bolan Puankare gipotezasyny subut eden geniý alymyň durmuşyndan söz açýar. Ýatlap geçsek, Perelmana bu açyşy üçin 2010-njy ýylda 1 million dollar baýrak dabaraly ýagdaýda hödürlenipdi, emma ol halkara matematikler jemgyýetiniň alyp barýan syýasaty bilen ylalaşman, bu uly puldan doly ýüz öwrüpdi.

Gysga wideo tomaşaçylary garly Sankt-Peterburg şäheriniň köçelerine syýahata alyp gidýär. Öňki ýylda aktör Eydelşteýniň surata düşüriliş meýdançalarynda goýberilen uly sakally görnüşleri, bu filmde alymyň diňe bir ýaşlyk döwri däl, eýsem bütindünýä şöhratyny gazanan kämillik ýyllarynyň hem görkeziljekdigini subut edýär. Baş keşbi ýerine ýetiren Mark Eydelşteýn mundan ozal «Kemençe» («Смычок») serialy, şeýle-de režissýor Şon Beýkeriň 2024-nji ýylda surata düşüren hem-de «Oskar» baýragyny alan amerikan filmi «Anora» arkaly dünýä derejesinde uly meşhurlyk gazanypdy.

«Witrindäki nusga» filminiň ilkinji resmi tanyşdyryş görkezilişi şu ýylyň tomus aýlarynda geçiriljek halkara kinofestiwallaryň birinde bolar. Kinoteatrlaryň uly ekranlarynda bolsa bu taslama geljek ýyldan başlap tomaşaçylara hödürlener.