Oýun sanawy
Halkara futbol federasiýasy (FIFA) 2026-njy ýylyň dünýä birinjiliginde girdejileri artdyrmagyň täze usulyny ulanmakçy bolýar. Ýörite taslamanyň çäklerinde tomaşaçylar belli bir mukdardaky serişdäni tölemek arkaly öz atlaryny sport meýdançalarynyň uly ekranlarynda görkezmäge mümkinçilik alarlar. Hyzmatyň bahasy 79 amerikan dollaryna barabar bolar.
«Super Shoutout» diýlip atlandyrylan bu täze maksatnama halkara ýaryşynyň toparçalaýyn tapgyrynda guraljak 72 duşuşygyň ählisini öz içine alar. Tölengi amala aşyran janköýerleriň atlary meýdançalardaky elektron tagtalarda ýörite tertipde görkeziler.
Şertlere laýyklykda, raýatlaryň şahsy maglumatlary diňe oýunlaryň öňüsyrasyndaky taýýarlyk we gyzyşma pursatlarynda ekrana çykarylar. Bäsleşikleriň göni ýaýlymy başlanan pursadyndan bolsa bu maglumatlar ekranlardan aýrylar.
Federasiýanyň resmileri bu hyzmatyň diňe stadionlaryň özüne gelýän tomaşaçylar üçin niýetlenendigini anyklaşdyrdylar. Şol sebäpli atlaryň teleýaýlymlarda, internet platformalarynda ýa-da beýleki media önümlerinde görkezilmegine kepillik berilmeýär. Ýatlap geçsek, dünýä çempionaty 2026-njy ýylyň 11-nji iýuny bilen 19-njy iýuly aralygynda ABŞ-nyň, Kanadanyň we Meksikanyň meýdançalarynda geçiriler.
Şeýle hem okanyň
«Arsenalyň» wingeri Bukaýo Saka ynsanperwerlik işleri üçin abraýly Sokrates baýragyna mynasyp boldy
Bugün 05:10Londonyň «Arsenal» klubunyň we Angliýanyň milli ýygyndysynyň wingeri Bukaýo Saka köp sanly ýurtlarda mätäç adamlara we çagalara beren ynsanperwerlik kömegi üçin abraýly Sokrates baýragy bilen sylaglandy. Bu halkara sylag futbolçy 26-njy oktýabrda Londonda geçirilen «Altyn top» gowşurylyş dabarasynda dabaraly ýagdaýda gowşuryldy. Saka kyn ýagdaýa düşen maşgalalara hem-de çagalara lukmançylyk kömegini berýän «Big Shoe» haýyr-sahawat guramasy bilen bütin dünýä boýunça ýakyn hyzmatdaşlyk amala aşyrýar.
Bilelikdäki haýyr-sahawat taslamalarynyň çäklerinde iňlis futbolçysy Nigeriýada we beýleki Afrika ýurtlarynda çagalar üçin gaýragoýulmasyz hirurgiki operasiýalary maliýeleşdirmäge giňden goldaw berdi. «France Football» neşiriniň maglumatlaryna görä, bu ynsanperwer amallaryň netijesinde 100-den gowrak çaga saglygyny dikeltmek üçin zerur bolan lukmançylyk kömegini aldy. Mundan başga-da, Saka Türkiýede we Marokkoda bolup geçen weýrançylykly ýertitremelerden ejir çeken maşgalalar üçin wagtlaýyn ýaşaýyş jaýlarynyň gurluşygyna uly möçberde serişde gönükdirdi.
Sokrates baýragy 2022-nji ýylda «France Football» žurnaly tarapyndan «Peace and Sport» guramasy hem-de meşhur braziliýaly futbolçy Sokratesiň maşgalasy bilen bilelikde döredildi. Bu baýrak futbol wekillerine meýdançadan daşary amala aşyran jemgyýetçilik we ynsanperwerlik taslamalary üçin gowşurulýar. Baýragyň taryhdaky ilkinji eýesi senegally hüjümçi Sadio Mane bolupdy, Sakanyň bu ýeňşi bolsa sportuň jemgyýetçilik jogapkärçiligini ýene bir gezek dünýä aýan etdi.
Blitz