Oýun sanawy
Türkmenistanyň futbol boýunça Ýokary ligasynyň 2026-njy ýylky möwsüminiň ilkinji tapgyrynda «Arkadag» topary Marynyň «Merw» toparyndan uly aratapawut bilen üstün çykdy. Aşgabatda geçirilen duşuşykda meýdança eýeleri bäsdeşlerini 7:1 hasabynda utmagy başardylar. Bu ýeňiş täze bellenen baş tälimçi Rahmanguly Baýlyýewiň ýolbaşçylygyndaky ilkinji resmi oýun hökmünde hasaba alyndy.
Oýnuň dowamynda «Arkadag» toparynyň futbolçylary doly agdyklyk etdiler. Pökgüleri Rahman Muratberdiýew (21), Resul Hojayew (25, 72), Ylýas Çaryýew (40), Yhlas Toýjanow (52), Baýram Ataýew (58) we Didar Durdyýew (63) öz atlaryna ýazdyrdylar. «Merw» toparynyň ýeke-täk jogap pökgüsini bolsa oýnuň ahyryna golaý Abdyresul Abdyýew (78) geçirdi.
Geçen möwsümiň çempiony bolan «Arkadag» üçin bu başlangyç öz titulyny goramak ugrundaky ynamly ädim boldy. Ýaryşyň indiki tapgyrynda, 12-nji aprelde «Arkadag» öz meýdançasynda «Ahal» toparyny kabul eder. «Merw» bolsa 11-nji aprelde Maryda «Nebitçi» topary bilen duşuşar.
Şeýle hem okanyň
Gyrgyzystanda geçirilen VI Bütindünýä çarwadarlar oýunlary dabaraly ýagdaýda tamamlandy. Dünýäniň 106 ýurdundan 3 müňe golaý türgeniň gatnaşmagynda geçen bu halkara etnosport ýaryşynda Türkmenistanyň milli ýygyndysy uly üstünlik gazandy. Biziň pälwanlarymyz bäsleşikleriň netijeleri boýunça 2 altyn, 3 kümüş we 6 bürünç — jemi 11 medal eýeläp, umumy medal sanawynda 7-nji orny eýelediler. Меdal toplamakda birinji orny Gazagystan, ikinji orny Gyrgyzystan, üçünji orny bolsa Russiýa eýeledi.
Milli ýygyndymyzyň türgenleri milli göreş, kuraş, alyş, ssirym, gazak we azerbaýjan göreşleri ýaly ugurlarda tapawutlandylar. Bäsleşikleriň maksatnamasy diňe bir güýç synanyşyklaryny däl, eýsem kök-börü, er-eňiş, guşly aw oýunlary we «otly çapyksuwar» şowusy ýaly täsirli medeni dabaralary hem öz içine aldy. Ýapylyş dabarasynda dron şüweleňi we halkara konsert geçirildi, şeýle hem nobatdaky VII Oýunlary 2028-nji ýylda geçirmek gezegi Russiýanyň Kazan şäherine gowşuryldy.
Blitz