Meteorologiýa gulluklarynyň soňky hasabatlaryna görä, Hindistan häzirki wagtda dünýäniň iň yssy nokadyna öwrüldi. Halkara howa hili monitoringini alyp barýan edaralaryň maglumatlary dünýäniň iň ýokary gyzgynlyk derejeli şäherleriniň agramly böleginiň hut şu ýurtda ýerleşýändigini görkezýär. Hasabat döwründe dünýäniň iň yssy 20 nokadynyň 19-sy Hindistanyň çäginde hasaba alyndy.

Howanyň temperaturasy aýratyn ştatlarda, şol sanda Bihar, Günbatar Bengaliýa we Uttar-Pradeş ýaly sebitlerde 43 gradusdan ýokary galyp, rekord derejelere ýetdi. Bhagalpur, Talçer we Asansol ýaly şäherlerde termometrleriň görkezijileri eýýäm 44-45 derejä çenli gyzdy. Bu sanawda Hindistandan başga diňe goşny Nepal döwletiniň Lumbini obasy ýeke-täk nokat hökmünde bellenip geçilýär.

Hünärmenler bu adatdan daşary gyzgynlygyň sebäplerini birnäçe faktor bilen düşündirýärler. Birinjiden, şu ýylyň aprel aýynda ýagan ygalyň mukdarynyň örän az bolmagy topragyň çendenaşa gyzmagyna getirdi. Ikinjiden, bulutsyz açyk asman Günüň radiasiýasynyň göni we dowamly täsir etmegine şert döretdi, bu bolsa atmosferanyň gyzgynlygyny has-da ýokarlandyrdy.

Mundan başga-da, Gimalaý daglaryndaky gar örtüginiň azalmagy tebigy sowadyş ulgamyna oňaýsyz täsir edýär. Ak gar örtügi Günüň şöhlesini yzyna serpikdirmek wezipesini ýerine ýetirýän hem bolsa, häzirki ýagdaýda bu hadysanyň peselmegi sebitde ýylylyk tolkunlarynyň dowamlylygyny artdyrýar. Ýerli häkimiýetler ilatyň saglygyny goramak maksady bilen howpsuzlyk çärelerini güýçlendirýärler.