Ýewropa yzygiderli yssy we gurak аба-howa şertleri sebäpli soňky ýyllaryň iň agyr hasylsyzlygy bilen ýüzbe-ýüz boldy. «The Guardian» neşiriniň berýän maglumatlaryna görä, Fransiýanyň, Italiýanyň we Ispaniýanyň oba hojalyk öndürijileri galla, gök önüm we süýt önümçiliginde çynlakaý ýitgileriň çekilendigini mälim etdiler.

Ýewropanyň iň iri galla öndürijisi bolan Fransiýada mekgejöwen hasyly 35% peselip, 9 million tonna çenli azaldy. Bu görkeziji 1980-nji ýyldan bäri iň pes netije hökmünde katda alyndy. Şeýle hem ýurtda brokkoli 60%, artişok 50–100%, nohut 40%, salat 35% we kabak önümçiligi 25% azaldy. Mal iýminiň önümçiligi bolsa köpýyllyk ortaça görkezijiden 30% peseldi.

Italiýada gurakçylyk ekin meýdanlarynyň 60%-ine golaýyna zyýan ýetirip, süýt önümçiliginiň 20% azalmagyna getirdi. Ispaniýanyň Kastiliýa we Leon sebitinde galla hasyly 35%, Madridde 49%, Andalusiýada bolsa 24% peseldi. Şeýle hem ýurtda goýun süýdi 6,5%, geçi süýdi 10,8% azaldy, çakyr önümçiliginiň bolsa 2026-njy ýylda 20% aşak düşmegine garaşylýar.

Döwletler oba hojalyk pudagyna goldaw bermek çärelerini yglan etdiler. Fransiýanyň premýer-ministri Sebastýan Lekornýu gaýragoýulmasyz kömek hökmünde 145 million ýewro möçberinde serde bölünip beriljekdigini, şeýle hem 2027-nji ýylyň býujetinde gurluş maýa goýumlarynyň göz öňünde tutuljakdygyny bildirdi.