Türkmenistanyň Belgiýa Patyşalygyndaky ilçihanasynda Aziýa ýurtlaryna, esasan hem Hytaý Halk Respublikasyna wekilçilik edýän 30 sany talypdan ybarat topar üçin tanyşlyk duşuşygy guraldy. Bilim maksatnamasynyň çäklerinde Brýussele gelen ýaşlar Ýewropa Bileleşiginiň edaralarynyň işi, ýewropa diplomatiýasynyň binýatlyk ýörelgeleri we diplomatik wekilhanalaryň alyp barýan amaly işleri bilen tanyşdylar.

Maksatnamanyň çäginde Türkmenistanyň Belgiýadaky Adatdan daşary we Doly ygtyýarly ilçisi Sapar Pälwanow talyplary ilçihananyň binasynda kabul etdi. Şol bir wagtyň özünde Ýewropa Bileleşiginiň ýanyndaky wekilhana bolup hem hyzmat edýän bu diplomatik edarada ilçi myhmanlara Türkmenistanyň daşary syýasatynyň hemişelik Bitaraplyga, parahatçylyk söýüjilige we hoşniýetli goňşuçylyga esaslanýan ugurlary hem-de 2026-njy ýylda bellenilýän döwlet Garaşsyzlygynyň 35 ýyllygy sebäpli gazanylan üstünlikler barada giňişleýin maglumat berdi.

Tanyşdyrylyşyň dowamynda 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» diýen şygaryna hem-de ahalteke bedewleriniň türkmen halkynyň taryhynda we medeniýetinde eýeleýän ornuna aýratyn üns çekildi. Ilçi bu özboluşly atlaryň milli buýsanç hem-de gözelligiň we wepalylygyň nyşanydygyny nygtap, gatnaşyjylary 2026-njy ýylyň sentýabr aýynda Niderlandlarda geçirilmegi meýilleşdirilýän iri halkara atçylyk we medeni çärelerine görülýän taýýarlyk bilen tanyşdyrdy.

Tanyşdyrylyş tamamlanandan soňra, ilçi talyplaryň arasynda Türkmenistanyň taryhy, daşary syýasaty hem-de medeni mirasy boýunça bilim wiktorinasyny geçirdi. Soraglara takyk jogap beren gatnaşyjylara ýadygärlik sowgatlar gowşuryldy, wiktorinada iň ýokary netijäni görkezen talyba bolsa baş baýrak hökmünde milli türkmen halysy gowşuryldy.