Moskwanyň «Rus aýdymy» döwlet akademiki teatrynda Türkmenistanyň Russiýa Federasiýasyndaky Medeniýet günleriniň dabaraly açylyş çäresi geçirildi. Bu halkara medeni çärä Russiýanyň DIM-niň wekilleri, daşary ýurtly diplomatlar, medeniýet we ylym işgärleri, şeýle hem Russiýanyň dürli sebitlerinde ýaşaýan türkmen diasporalarynyň agzalary hem-de talyplar uly gyzyklanma bildirdiler. Sungat baýramçylygyna gatnaşmak üçin ýurdumyzyň öňdebaryjy artistlerinden, opera we estrada aýdymçylaryndan ybarat wekilçilikli topary Russiýa sapar gurady.

Medeni çäräniň açylyşynyň çäklerinde teatryň eýwanynda Türkmenistanyň Döwlet medeniýet merkeziniň Döwlet muzeýiniň hem-de Şekillendiriş sungaty muzeýiniň gymmatlyklaryndan ybarat sergi guraldy. Sergide halkymyzyň taryhyny we çeperçilik senedini açyp görkezýän milli şaý-sepler, amaly-haşam sungatynyň nusgalary, el keşdeleri we nepis türkmen halylary ýerleşdirildi. Görkezilen gymmatlyklar hem-de zenan lybaslary daşary ýurtly tomaşaçylarda milli medeniýetimiziň gadymylygy we özboluşlylygy barada ýokary täsir galdyrdy.

Dabarada çykyş eden resmi wekiller şeýle duşuşyklaryň türkmen-rus ynsanperwer gatnaшyklarynyň köpýyllyk asylly däplerine doly laýyk gelýändigini we dostluk köprülerini has-da pugtalandyrýandygyny bellediler. Taraplar iki ýurduň halklarynyň arasyndaky hoşniýetli goňşuçylyk gatnaşyklarynyň häzirki zaman şertlerinde yzygiderli we sazlaşykly ösdürilýändigini, munda medeni diplomatiýanyň eýeleýän ornunyň uludygyny tassykladylar.

Konsertiň dowamynda türkmen sungat ussatlary özüniň ajaýyp çykyşlary bilen teatryň zalyny dolduran tomaşaçylary haýran galdyrdylar. Sahnada milli wokal we halk tanslary, şeýle hem kirişli we üflenip çalynýan gadymy saz gurallarynda ýerine ýetirilen nusgawy eserler ýaňlandy. Medeniýet günleriniň meýilnamasyna laýyklykda, saparyň dowamynda iki ýurduň döredijilik işgärleriniň arasynda tejribe alyşmak duşuşyklary ýola goýlar we türkmen wekilleri üçin Moskwanyň taryhy künjeklerine gezelençler guralar.