77-nji Berlin halkara kinofestiwalynyň (Berlinale) geçiriljek wagty resmi taýdan belli boldy. Kinematografiýa dünýäsiniň iň möhüm çäreleriniň biri hasaplanýan bu festiwal 2027-nji ýylyň 10-21-nji fewraly aralygynda Germaniýanyň paýtagtynda geçiriler. Festiwalyň resmi saýtynda habar berlişi ýaly, bu gezekki çäre özüniň guralyş tertibi we täze goşundylary bilen ozalky ýyllardan birneme tapawutlanar.

Guraljak dabaranyň açylyşy adaty bolşy ýaly penşenbe güni däl-de, eýsem bir gün öň — çarşenbe güni bolar. Bu üýtgeşme festiwalyň iş tertibini has-da giňeltmäge mümkinçilik berer. Kinofestiwalyň iň garaşylýan pursady bolan ýeňijileri sylaglamak we "Altyn aýy" baýragyny gowşurmak dabarasy bolsa 19-njy fewralda geçiriler. Şeýlelikde, festiwalyň esasy bäsleşik bölümi on günüň dowamynda dowam eder.

Festiwalyň direktory Trişa Tattlyň bellemegine görä, 2027-nji ýylyň programmasyna goşmaça iki gün (20 we 21-nji fewral) goşuldy. Bu günler "Berlinale Publikumstage" ýa-da "Tomaşaçylar günleri" hökmünde yglan edildi. Bu täzeçillik kino muşdaklaryna festiwalyň programmasyndaky ähli filmlere doly derejede tomaşa etmäge we kinematografiýaçylar bilen duşuşmaga giň mümkinçilik döreder.

Şeýle hem, festiwalyň çäklerinde geçirilýän Ýewropa kinobazary (EFM) öz wagtyny giňeltdi. Kino pudagynyň hünärmenleri üçin niýetlenen bu platforma 2027-nji ýylda 9-16-njy fewral aralygynda işlär. Ýatlap geçsek, geçen Berlinale "Sary harplar" atly türk dramasynyň ýeňşi bilen tamamlanypdy. 77-nji festiwalyň emin agzalarynyň düzümi we gatnaşjak filmleriň sanawy bolsa çäräniň başlanmagyna golaý wagtda mälim ediler.