Ýuwaş ummandaky uly bolmadyk Nauru döwleti öz resmi adyny Naoro Respublikasy diýip üýtgetdi. Ýurduň häkimiýetleriniň bellemegine görä, däp bolan taryhy ada dolanmak milli özboluşlylygy berkitmäge hem-de medeni mirasy gorap saklamaga gönükdirilendir.

«Reuters» agentliginiň ýazmagyna görä, maý aýynda ýurduň Parlamenti döwletiň adyny üýtgetmek boýunça sedalaşyk geçirmegi teklip edipdi. Şeýle-de bolsa, Prezident Dewid Adang öz sosial tordaky sahypasynda bu sala salşygy geçirmek meýilnamasyndan ýüz öwürendiklerini habar berdi.

Döwlet Baştutany adanyň ýaşaýjylarynyň öz ýurtlaryny taryhtan bäri Naoro diýip atlandyrýandyklaryny düşündirdi. Bu at eýýäm ýurduň Konstitusiýasynda berkidilen hem-de Döwlet tugrasynda bar bolup, «Nauru» diýen şekil bolsa diňe ýewropaly koloniýaçylaryň aýtmagy çylşyrymly bolandygy sebäpli emele gelipdi.

Resmi adyň üýtgetilmegi ýurduň taryhy adalatlylygyny dikeltmekde we medeni özygtyýarlylygyny berkitmekde möhüm ädim boldy. Naoro Respublikasynyň Hökümeti bu kararyň ilatyň milli buýsanjyny has-da ýokarlandyrjakdygyna ynanýar.