Özbegistanyň taryhy Buhara şäherinde goňşy ýurduň däp-dessurlary, milli senetçiligi, taryhy we medeni mirasy bilen gaýybana tanyşmaga mümkinçilik berjek «Kiçijik Türkmenistan» medeni-syýahatçylyk toplumyny döretmek meýilleşdirilýär. Uza.uz habar portalynyň ýaýradan maglumatlaryna görä, bu täze taslama myhmanlara Türkmenistanyň özboluşly milli ýaşaýyş gurşawyna we baý medeniýetine aralaşmaga şert döredýän etno-medeni giňişlik hökmünde göz öňünde tutulýar.

Halkara taslamanyň çäklerindäki ilkinji duşuşyk Özbegistanyň Syýahatçylyk komitetiniň başlygynyň orunbasarynyň, Türkiýäniň Finwest Finance Company maýa goýum kompaniýasynyň, Ýewraziýanyň ýerli öz-özüni dolandyryş edaralarynyň birleşiginiň hem-de türkmen halylaryny öndürmek bilen meşgullanýan «SD Turkmen Haly» bilelikdäki özbek-türkmen kärhanasynyň wekilleriniň gatnaşmagynda geçirildi. Duşuşykda taraplar кеlejekki toplumyň binýatlyk ugurlaryny maslahatlaşdylar.

Toplumyň esasy maksady diňe bir milli senetçilik däplerini we amaly-haşam sungatynyň ekspozisiýalaryny görkezmek bilen çäklenmän, eýsem gelen myhmanlara Türkmenistanyň medeni we ruhy ýörelgelerini doly duýmaga mümkinçilik döretmekden ybaratdyr.

Taslamany durmuşa geçirmek üçin Buhara şäheriniň saýlanyp аlynmagy tötänleýin däl. Taryhy ýadygärlikleri bilen ÝUNESKO-nyň Bütindünýä mirasynyň sanawyna girizilen bu şäher Özbegistanyň iň gelim-gidimli syýahatçylyk merkezleriniň biri bolup, her ýyl ýüzlerçe müň daşary ýurtly syýahatçyny kabul edýär. Mundan başga-da, Buharany we Türkmenistany Beýik Ýüpek ýolunyň asyrlarboýy dowam eden söwda ýollary, umumy taryh we ýakyn medeni gatnaşyklar berkbaglanyşdyrýar.