«South China Morning Post» neşiri «Rhodium Group» barlag merkeziniň maglumatlaryna salgylanyp, Hytaý Halk Respublikasynyň ilat sanynyň geljek on ýyllykda düýpli azaljakdygy barada habar berýär. Çaklamalara görä, ilatynyň azalmak möçberi takmynan 60 million adama ýetip biler. Bu görkeziji Fransiýa ýaly uly döwletiň umumy ilatyna deň bolup, Hytaýyň durmuş-ykdysady ösüşine uly täsirini ýetirer.

Ilat sanynyň aşaklamagyna ilkinji nobatda dogluşyň derejesiniň yzygiderli peselmegi sebäp bolýar. 2025-nji ýylda dünýä inen çagalaryň sany 7,92 milliona deň bolup, bu görkeziji 2024-nji ýyl bilen deňeşdirilende 17 göterim azdyr. Eýýäm dört ýyl bäri dowam edýän bu ýagdaý durmuşyň gymmatlamagy, ýaşaýyş jaý şertleriniň kynlaşmagy we ýaşlaryň maşgala gurmaga bolan garaýşynyň üýtgemegi bilen düşündirilýär.

Demografik krizis eýýäm ýurduň maliýe ulgamyna öz täsirini görkezip başlady. 2025-nji ýylda döwlet býujetinden durmuş üpjünçiligi gaznalaryna berlen maliýe kömegi 2,5 trillion ýuana (takmynan 425 milliard dollar) ýetdi. Bu serişde ýurduň umumy býujetiniň 10,1 göteriminden gowragyny düzýär. Ilatynyň garalmagy we işjeň gatlagyň azalmagy bilen döwletiň sosial harajatlarynyň geljekde has-da artmagyna garaşylýar.

Mundan başga-da, ilat sanynyň kemelmegi ykdysadyýetiň karzlaşdyryş ulgamyna hem täsir eder. «Rhodium Group» bilermenleriniň bellemegine görä, müşderileriň we işçi güýjüniň azalmagy karz bazaryndaky işjeňligiň peselmegine hem-de göterim stawkalarynyň üýtgemegine getirer. Bu ýagdaý dünýäniň iň uly ykdysadyýetleriniň biri üçin täze strategik çemeleşmeleri talap edýär.