Şu günler Türkmenistanyň ähli sebitlerinde halk teatrlarynyň arasynda guralýan «Şadyýan şahandazlar» atly bäsleşigiň welaýat tapgyrlary ýokary guramaçylyk derejesinde dowam edýär. Şonun çäklerinde, Balkanabat şäherindäki Beýik Saparmyrat Türkmenbaşy adyndaky Balkan welaýat döwlet drama teatrynda bäsleşigiň nobatdaky welaýat tapgyry geçirildi. Milli medeniýetimizi we teatr sungatymyzy dabaralandyrýan bu bäsleşik sebitiň döredijilik toparlaryny we medeniýet muşdaklaryny bir ýere jemledi.

Halk teatrlarynyň arasynda degişme sahna eserlerini ýerine ýetirmek boýunça ýaýbaňlandyrylan bu bäsleşikde, gatnaşyjylaryň çykyşlarynda türkmen halkynyň gadymdan gelýän asylly häsiýetleri, şahandazlygy, göwnaçyklygy, wäşiligi, dilewarlygy hem-de suhangöýligi aýdyň beýanyny tapdy. Sahna ussatlary özleriniň şorta sözleri, gülkili pursatlary we pelsepewi degişmeleri arkaly tomaşaçylara ruhy lezzet paýladylar we halkyň durmuş ýörelgelerini çeper keşplerde janlandyrdylar.

Emin agzalarynyň gelen netijeli çözgüdine görä, Gyzylarbat etrabynyň medeniýet bölüminiň Janahyr şäherçe halk teatry bäsleşigiň baş baýragyna (Gran-pri) mynasyp boldy. Şeýle-de, ýaryşda uly ussatlyk görkezen Türkmenbaşy şäher medeniýet bölüminiň halk teatry 1-nji orny, Gyzylarbat etrabynyň medeniýet bölüminiň halk teatry 2-nji orny we Bereket etrabynyň medeniýet bölüminiň halk teatry bolsa 3-nji orny eýelemegi başardylar. Ýeňiji bolan toparlar bäsleşigiň döwlet tapgyryna gatnaşmaga hukuk gazandylar.