Ýagşygeldi Kakaýew adyndaky Halkara nebit we gaz uniwersitetinde geçirilen «Bilim üçin Durnukly Ösüşiň Maksatlaryna ýetmekde emeli aňyň mümkinçilikleri» atly ylmy-amaly maslahatda Türkmenistanyň Bilim ministriniň orunbasary Azat Ataýew çykyş etdi. Ol maslahatyň umumy meselelerini ara alyp maslahatlaşmagyň çäklerinde birnäçe pikirleri we teklipleri beýan etdi.

 

Bellenilişi ýaly, gün-günden ösýän we kämilleşýän sanly dünýäniň mümkinçiliklerinden işjeň peýdalanmak üçin sanly şahsy platformalary işjeň ösdürmek wajyp bolup durýar. Mundan başga-da emeli aňyň peýdaly gurallaryny kämilleşdirmek we umumylaşdyrmak bu maksatlara ýetmekde esasy ädimlerdir.

 

Türkmenistanyň bilim ministriniň orunbasary Azat Ataýew bilim ulgamynda emeli aňyň we sanly tehnologiyalaryň mümkinçiliklerini peýdalanmak isleýänler üçin täze we peýdaly sanly kontentleri döretmegiň wajypdygyna ünsi çekip, bu ugurda amala aşyrylmaly işler barada durup geçdi.

 

Ýeri gelende bellesek: bu möhüm halkara ylmy-amaly maslahaty Türkmenistanyň Bilim ministrligi hem-de ÝUNESKO-nyň Bilim ulgamynda maglumat tehnologiýalary instituty bilen bilelikde guralyp, ol emeli aňyň mümkinçilikleriniň milli we halkara derejede bilim ulgamyna ornaşdyrylmagyny ara alyp maslahatlaşmaklygy, bu ugurdaky dünýä tejribesi bilen paýlaşmaklygy hem-de täze çözgütleri öňe sürmekligi maksat edinýär.