Halkara konkide typyjylaryň birleşiginiň kararyna laýyklykda, Gazagystanyň paýtagty taryhda ilkinji gezek figuralaýyn typmak boýunça Dört yklymyň çempionatyny gurar. Halkara sport ýaryşy 2027-nji ýylyň 9—14-nji fewraly aralygynda geçiriler we ol Aziýanyň, Afrikanyň, Amerikanyň hem-de Okeaniýanyň öňdebaryjy türgenlerini bir ýere jemlär. Bu çäre sebitde figuralaýyn typmak boýunça amala aşyryljak iň iri taslama öwrüler. Guramanyň ýolbaşçysynyň bellemegine görä, ýaryşyň bu ýerde guralmagy Merkezi Aziýada sportuň agzalýan görnüşini has-da ösdürmäge we kämilleşdirmäge ýordam eder. Gazagystanyň gyşky sport taslamalaryny, şol sanda Gyşky Aziýa oýunlaryny we Uniwersidadany geçirmekde öňden bar bolan tejribesi hem-de türgenleriniň halkara derejedäki soňky üstünlikleri bu ýaryşy kabul etmekde möhüm şert boldy. Dört yklymyň çempionaty Ýewropa zolagyna girmeýän döwletleriň arasynda her ýyl guralyp, ähmiýeti boýunça dünýä birinjiliginden soňky ikinji esasy sport bäsleşigi hasaplanýar.