Oýun sanawy
Aşgabatda Türki dil maşgalasynyň Bütindünýä gününe bagyşlanan çäre geçirildi
21 Ýan. 17:19Aşgabat şäherinde Türkiýe Respublikasynyň Türkmenistandaky ilçihanasynyň ýanyndaky Medeniýet merkezinde 15-nji dekabryň Türki dilli maşgalanyň Bütindünýä güni hökmünde yglan edilmegine bagyşlanan medeni çäre guraldy.
Çärä Türkmenistandaky diplomatik korpusyň wekilleri, köpçülikleýin habar beriş serişdeleriniň işgärleri, şeýle hem paýtagtymyzyň ýaşaýjylary we myhmanlary gatnaşdy.
Bu duşuşyk ÝUNESKO-nyň Samarkant şäherinde geçirilen Baş maslahatynyň 43-nji sessiýasynda kabul edilen kararyň netijesinde guraldy. Karara laýyklykda, 15-nji dekabr Türki dilli maşgalanyň Bütindünýä güni diýlip resmi taýdan ykrar edildi. Türkiýe Respublikasynyň Prezidenti Rejep Taýyp Ärdogan tarapyndan öňe sürlen bu başlangyç halkara jemgyýetçiligi tarapyndan goldanyldy we türki halklaryň umumy dil, medeni hem-de taryhy gymmatlyklaryny dünýä derejesinde giňden tanatmaga gönükdirildi.
Çäräniň dowamynda çykyş eden Türkiýäniň Türkmenistandaky Adatdan daşary we Doly ygtyýarly ilçisi Ahmet Demirok täze halkara gününiň halklaryň arasynda dost-doganlyk gatnaşyklaryny berkitmekde, medeni hyzmatdaşlygy ösdürmekde hem-de özara düşünişmegi pugtalandyrmakda möhüm ähmiýete eýedigini belledi.
ÝUNESKO-nyň maglumatlaryna görä, häzirki wagtda türkmen, türk, azerbaýjan, gazak, gyrgyz we özbek dilleri bilen birlikde türki diller dünýäde 200 milliondan gowrak adamyň ene dili bolup durýar. Bu dilleriň ýaýran giňişligi takmynan 12 million inedördül kilometr meýdany öz içine alýar.
Çäräniň maksatnamasy türki halklaryň taryhyna we medeni baýlyklaryna bagyşlanan wideo materiallar bilen dowam etdirildi.
Her ýylyň 15-nji dekabrynda Türki dilli maşgalanyň Bütindünýä gününiň bellenilmegi maddy däl medeni mirasy gorap saklamaga hem-de dünýäde dilleriň köpdürlüligini wagyz etmäge hyzmat eder.
Şeýle hem okanyň
Türkmen alabaýynyň baýramynda iki hünärmene «Türkmenistanyň at gazanan itşynasy» diýen hormatly at dakyldy
26 Okt. 07:21Türkmenistanyň Prezidenti Serdar Berdimuhamedow milli baýramçylyk bolan Türkmen alabaýynyň güni mynasybetli «Türkmenistanyň at gazanan itşynasy» diýen hormatly ady dakmak baradaky degişli Permana gol çekdi. TDH habarlar gullugynyň habar bermegine görä, bu resminama milli itşynaslyk mekdebiniň köpasyrlyk däplerini saklamakda hem-de türkmen alabaýlarynyň şan-şöhratyny dünýä ýaýmakda uly hyzmatlary bitiren zähmetkeşleri sarpalamaga gönükdirilendir.
Döwlet Baştutanymyzyň Permanyna laýyklykda, alabaý itlerini ylmy esasda saklamakda, köpeltmekde we olaryň tohum arassalygyny goramakda köp ýyllaryň dowamynda çeken halal hem-de göreldeli zähmeti göz öňünde tutulyp, iki raýata bu ýokary döwlet ady gowşuryldy. Şunlukda, Türkmenistanyň Döwlet serhet gullugynyň Merkezi gulluk itlerini köpeldiş we kämilleşdiriş ýeriniň uly tehnigi Begmyrat Halwatjanow hem-de Türkmenistanyň Döwlet migrasiýa gullugynyň harby bölüminiň it idedijisi Parahat Bäşimow bu mukaddes ada mynasyp görüldiler.
Ata-babalarymyzdan miras galan türkmen alabaýlary halkymyzyň baý medeni mirasynyň aýrylmaz bölegi bolup durýar. Häzirki wagtda ýurtda alabaýlaryň baş sanyny artdyrmak, olary halkara derejede wagyz etmek we harby hem-da hukuk goraýjy edaralarda gulluk itleri hökmünde netijeli ulanmak boýunça giň göwrümli döwlet maksatnamalary üstünlikli amala aşyrylýar.
Şeýle hem okanyň
Blitz