Londonuň «Arsenal» futbol kluby UEFA-nyň Çempionlar ligasynyň ýarym finalynyň jogap duşuşygynda Madridiň «Atletiko» toparyndan üstün çykdy. Iki duşuşygyň netijesi boýunça gazanylan 2:1 hasabyndaky ýeňiş «topçularyň» soňky iki onýyllygyň dowamynda ilkinji gezek ýaryşyň finalyna çykmagyna mümkinçilik berdi. Bu netije klubyň häzirki zaman taryhynda iň uly sport ösüşleriniň biri hökmünde bellenilip geçilýär.

Duşuşygyň gidişinde londonlylar strategik taýdan has kämil oýun görkezdiler. Birinji ýarymyň soňky pursatlarynda Bukaýo Sakanyň geçiren goly oýnuň ykbalyny çözüji pursat boldy. Goluň geçirilmeginde Leandro Trossaryň we derwezebandan gaýdan topa birinji ýetişen Sakanyň dessine beren jogaby möhüm rol oýnady. Oýnuň galan böleginde Mikael Artetanyň şägirtleri goragda örän durnukly saklanyp, garşydaşyň hüjümlerini doly zarpsyzlandyrmagy başardylar.

Häzirki möwsüm «Arsenal» üçin rekordlar eýýamy boldy. Topar şu ýylky ýaryşda entek bir gezek hem ýeňilmän, özüniň utulmazlyk tapgyryny 14 duşuşyga ýetirdi. Mundan başga-da, ähli resmi ýaryşlarda gazanylan 41-nji ýeňiş klubyň 1970-nji ýyllaryň başynda goýan taryhy rekordyny täzelemäge ýakynlaşdyrdy. Ýarym goragçy Deklan Raýsyň görkezen ýokary derejeli oýny oňa duşuşygyň iň gowy futbolçysy diýen ady getirdi.

Ýewropa futbolynyň iň uly baýragy ugrundaky final duşuşygy 30-njy maýda Wengriýanyň paýtagty Budapeşt şäherindäki «Puşkaş Arena» stadionynda geçiriler. «Arsenalyň» garşydaşy Pariž we Munahen wekilleriniň arasyndaky geçiriljek oýundan soň belli bolar. Sport bilermenleri londonlylar üçin bu finalyň täze bir futbol eýýamynyň başlangyjy bolup biljekdigini çaklaýarlar.