Oýun sanawy
«Ahal» futbol boýunça Türkmenistanyň çempionatynyň birinji tapgyrynda «Köpetdagy» uly hasap bilen ýeňdi
05 Aprel. 06:14Türkmenistanyň Ýokary ligasynyň birinji tapgyrynyň çäginde Änewiň «Ahal» topary öz meýdançasynda Aşgabadyň «Köpetdagyny» 5:1 hasabynda utdy. Duşuşyk Aşgabat şäheriniň adybir stadionynda geçirilip, onda «Ahalyň» doly agdyklygy duýuldy. Ýer eýeleri eýýäm birinji ýarymda üç pökgi girizip, duşuşygyň ykbalyny belli etdiler.
«Ahalyň» düzüminde gollary Süleýman Mirzoýew (33-nji minut), Oraz Orazow (37), Yslam Annamyradow (45), Hakmuhammet Bäşimow (56) we Ýakupmuhammet Bäşimow (89) dagylar öz atlaryna ýazdyrdylar. «Köpetdagyň» ýeke-täk jogap pökgüsini bolsa 76-njy minutda Mekan Amanyýazow geçirmegi başardy. Duşuşygyň ahyrynda, 95-nji minutda «Ahalyň» goragçysy Ruslan Priýew bir minudyň dowamynda iki gezek sary kartoçka alyp, meýdançadan kowuldy.
Geçen möwsümiň netijeleri boýunça «Ahal» kümüş medala mynasyp bolupdy, «Köpetdag» bolsa ýaryşy ýedinji orunda tamamlapdy. Indiki tapgyrda «Ahal» 12-nji aprelde myhmançylykda «Arkadag» topary bilen duşuşar. «Köpetdag» bolsa 11-nji aprelde öz meýdançasynda Aşgabadyň «Altyn Asyryny» kabul eder.
Şeýle hem okanyň
Gyrgyzystanda geçirilen VI Bütindünýä çarwadarlar oýunlary dabaraly ýagdaýda tamamlandy. Dünýäniň 106 ýurdundan 3 müňe golaý türgeniň gatnaşmagynda geçen bu halkara etnosport ýaryşynda Türkmenistanyň milli ýygyndysy uly üstünlik gazandy. Biziň pälwanlarymyz bäsleşikleriň netijeleri boýunça 2 altyn, 3 kümüş we 6 bürünç — jemi 11 medal eýeläp, umumy medal sanawynda 7-nji orny eýelediler. Меdal toplamakda birinji orny Gazagystan, ikinji orny Gyrgyzystan, üçünji orny bolsa Russiýa eýeledi.
Milli ýygyndymyzyň türgenleri milli göreş, kuraş, alyş, ssirym, gazak we azerbaýjan göreşleri ýaly ugurlarda tapawutlandylar. Bäsleşikleriň maksatnamasy diňe bir güýç synanyşyklaryny däl, eýsem kök-börü, er-eňiş, guşly aw oýunlary we «otly çapyksuwar» şowusy ýaly täsirli medeni dabaralary hem öz içine aldy. Ýapylyş dabarasynda dron şüweleňi we halkara konsert geçirildi, şeýle hem nobatdaky VII Oýunlary 2028-nji ýylda geçirmek gezegi Russiýanyň Kazan şäherine gowşuryldy.
Blitz