Türkmenistanyň ýangyç-energetika toplumynda amala aşyrylýan giň göwremli özgertmeler halkara hyzmatdaşlygyň täze belentliklere göterilmegine şert döredýär. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Hytaýyň «CGTN» teleýaýlymyna beren interwýusynda Türkmenistan — Hytaý gaz geçirijisi boýunça her ýylda iberilýän gazyň möçberini 65 milliard kub metre çenli artdyrmagyň meýilleşdirilýändigini mälim etdi. Bu strategik başlangyç iki ýurduň uzak möhletleýin bähbitlerine we sebitiň energetika howpsuzlygyny pugtalandyrmaga gönükdirilendir.

Ýangyç-energetika pudagy türkmen-hytaý hyzmatdaşlygynyň özeni bolup durýar. Iki ýurduň hökümetleriniň arasynda 2006-njy ýylda gol çekilen Baş ylalaşyk esasynda 2009-njy ýylyň dekabrynda taryhy gaz geçiriji ulanmaga berlipdi. Şol wagtdan bäri Türkmenistan Hytaýa durnukly ýagdaýda tebigy gaz üpjünçiligini amala aşyryp gelýär. 2026-njy ýylyň 1-nji martyna çenli bolan maglumatlara görä, bu turba geçirijisi arkaly Hytaý Halk Respublikasyna iberilen gazyň umumy möçberi 460 milliard kub metre golaýlady.

Häzirki wagtda dünýäniň iň iri gaz ýataklarynyň biri bolan «Galkynyş» känini özleşdirmek boýunça Hytaýyň «CNPC» kompaniýasy bilen işjeň hyzmatdaşlyk alnyp barylýar. Milli Liderimiziň bellemegine görä, bu taslamanyň çäklerinde her ýylda goşmaça 10 milliard kub metr tebigy gazy ibermek göz öňünde tutulýar. Bu bolsa Türkmenistanyň dünýäniň energetika bazaryndaky ornuny has-da pugtalandyrmaga we eksport mümkinçiliklerini diwersifikasiýa ýoly bilen ösdürmäge ýardam eder.

Bu ugurdaky işleriň hukuk binýadyny berkidilmegine hem uly üns berilýär. Türkmenistanyň Prezidenti Serdar Berdimuhamedow 20-nji martda geçirilen sanly ulgam arkaly Hökümet mejlisinde bu strategik taslamanyň durmuşa geçirilmegine itergi berýän degişli resminama gol çekdi. Şeýlelikde, Türkmenistan we Hytaý diňe bir energetika däl, eýsem ählumumy ykdysady ösüşiň bähbidine hyzmat edýän uzak möhletleýin we ygtybarly hyzmatdaşlygy dowam etdirýärler.