Oýun sanawy
Müsürde Ortaýer deňziniň düýbünden gadymy şäheriň heýkelleri çykaryldy
Aleksandriýa şäherinde alymlar Ortaýer deňziniň düýbünden gadymy heýkelleri we beýleki taryhy gymmatlyklary çykardylar. Bu tapyndylar gülläp ösen Tonis-Geraklion şäheriniň taryhyny öwrenmäge hem-de onuň birdenkä pese düşmegine düşünmäge mümkinçilik berýär diýip, «tagesschau.de» portaly gürrüň berýär. Müsüriň Gadymylyklar boýunça ýokary geňeşiniň başlygy Mohamed Ismail Halediň sözlerine görä, bu 2001-nji ýyldan bäri Tonis-Geraklion şäheriniň eteklerini öwrenmek boýunça taslamanyň çäklerindäki ilkinji üstünlikdir. Tapyndylaryň arasynda boýy 2,17 metr bolan başsyz we aýaksyz granit heýkel hem bar. Ýygnalan görnüşde onuň boýy bäş metre ýetýär. Arheologlar şeýle hem gadymy gäminiň galyndylaryny tapdylar. Hünärmenleriň pikiriçe, sebit Ptolomeýler eýýamynda Aleksandriýa şäheri esaslandyrylýança ýa-da Aleksandr Makedoniýalynyň döwründen tä rim döwrüne çenli gülläp ösüpdir. 1900-njy ýyllarda üsti açylan şäher biziň eýýamymyza çenli ikinji asyrda ýertitreme netijesinde ýumrulyp suwa gark bolupdyr. Tonis-Geraklion şäheri 331-nji ýylda Aleksandriýa şäheri gurulýança, Müsüriň deňiz söwdasynda wajyp orny eýeläpdir.
Şeýle hem okanyň
Iň köp görülen
Türkmenistanyň wekiliýeti Manasda GDA-nyň Serhet goşunlarynyň serkerdeleri Geňeşine gatnaşdy
Oktýabr aýynyň 30-da Gyrgyz Respublikasynyň Manas şäherinde geçirilen Garaşsyz Döwletleriň Arkalaşygynyň (GDA) Serhet goşunlarynyň serkerdeleri Geňeşiniň mejlisine Türkmenistanyň wekiliýeti gatnaşdy.
Mejlise Azerbaýjan, Belarus, Gazagystan, Gyrgyzystan, Russiýa, Täjigistan, Türkmenistan we Özbegistan döwletleriniň serhet gulluklarynyň wekilleri, şeýle hem GDA ýerine ýetiriji komitetiniň, Geňeşiň utgaşdyryjy gullugynyň, Kollektiw howpsuzlyk şertnamasy guramasynyň (KHSG), ŞHG-nyň we Serhet gullugynyň weteranlarynyň halkara birleşiginiň wekilleri gatnaşdy diýip, GDA-nyň ýerine ýetiriji komitetiniň saýtynda habar berilýär.
Geňeşde GDA agza ýurtlarynyň daşky serhetlerindäki ýagdaýlar seljerildi hem-de olaryň howpsuzlygyny berkitmek boýunça goşmaça çäreler kesgitlenildi.
Şeýle hem GDA-nyň Terrorçylyga garşy merkezi, Jenaýatçylyk bilen göreşi utgaşdyryjy býuro we ŞHG-nyň sebit terrorçylyga garşy gurluşy bilen hyzmatdaşlygy pugtalandyrmak meseleleri ara alnyp maslahatlaşyldy.
Geňeş 2025-nji ýylyň jemleri boýunça ýerine ýetirilen işleri seljerip, indiki döwür üçin ileri tutulýan ugurlary kesgitledi. Jemi 22 çözgüt kabul edilip, olar serhet howpsuzlygyny berkitmäge hem-de GDA ýurtlarynyň arasyndaky hyzmatdaşlygy giňeltmäge gönükdirildi.
Mundan başga-da, serhetleri goramakda aýratyn göreldelik görkezen harby gullukçylara Geňeşiň karary bilen sylaglar gowşuryldy.
Blitz