Türkmenistanyň Ýaponiýadaky ilçisi Atadurdy Baýramow 2026-njy ýylyň futbol boýunça dünýä çempionatyna gatnaşýan Özbegistanyň milli ýygyndysyna goldaw bildirdi. Bu barada Türkmenistanyň Ýaponiýadaky ilçihanasynyň metbugat gullugy habar berdi.

Diplomat Tokioda Merkezi Aziýa ýurtlarynyň we Azerbaýjanyň ilçileriniň özbek ýygyndysy bilen raýdaşlyk bildirmek maksady bilen geçirilen duşuşygyna gatnaşdy. «Biz doganlyk halkymyzyň ýanynda tüýs ýürekden durýarys we futbolçylara tutanýerlilik, erjellik hem-de meýdançada uly üstünlikleri arzuw edýäris» — diýip, Baýramow aýtdy.

Futbol boýunça dünýä çempionaty 11-nji iýundan 19-njy iýula çenli ABŞ-da, Meksikada we Kanadada geçirilýär. Özbegistanyň milli ýygyndysy öz taryhynda ilkinji gezek dünýä birinjiliginiň final tapgyryna çykmagy başardy. Toparçalaýyn tapgyryň ilkinji duşuşygynda özbek futbolçylary Kolumbiýanyň ýygyndysyndan 1:3 hasabynda ýeňildiler. Geljekki oýunlarda olar Portugaliýanyň we Kongo Demokratik Respublikasynyň ýygyndylary bilen duşuşarlar.