Türkmenistanyň futbol kluby «Altyn Asyr» 2025/26-njy möwsüm üçin Aziýanyň Futbol Konfederasiýasynyň (AFK) Çagyryş ligasynyň toparlaýyn tapgyryndaky garşydaşlaryny kesgitledi. 2025-nji ýylyň 28-nji awgustynda Malaýziýanyň Kuala-Lumpur şäherinde geçirilen bije çekişligiň netijesinde, «Altyn Asyr» günbatar zonalynyň «A» toparyna düşdi. Bu toparda onuň garşydaşlary hökmünde Butanyň «Paro», Omanyň «Al-Şabab» we Gyrgyzystanyň «Abdyş-Ata» klublary çykyş eder.

Topar duşuşyklary 2025-nji ýylyň 25 — 31-nji oktýabry aralygynda Butanda merkezi görnüşde geçiriler.

Düzgünnama laýyklykda, günbatar zonalardan her toparyň ýeňijileri we ikinji orny alan iň gowy bir topar çärýek finala çykar. Gündogar zona boýunça bolsa her topardan iň gowy iki klub indiki tapgyra geçmäge mümkinçilik alar.

Play-off tapgyryndaky oýunlar öýde we myhmançylykda geçiriler. Çärýek final duşuşyklary 2026-njy ýylyň mart aýynda, ýarym final aprelde, final duşuşygy bolsa 9-njy maýda geçiriler.