Oýun sanawy
«Al-Haldia» topary AFK-2 Çempionlar ligasynda Türkmenistanyň «Arkadag» kluby bilen duşuşyga doly taýýar
25 Dek. 06:56Bahreýni wekilçilik edýän «Al-Haldia» futbol toparynyň baş tälimçisi Lassad Çabbi AFK-2 Çempionlar ligasynyň toparçalaýyn tapgyryndaky aýgytly oýnuň öňüsyrasynda toparynyň doly sport ýagdaýyndadygyny belledi. Onuň aýtmagyna görä, topar Türkmenistanyň futbol abraýyny gorap çykyş edýän «Arkadag» kluby bilen duşuşyga ähli ugurlar boýunça taýýarlykly ýagdaýda barýar.
Tälimçiniň sözlerine görä, häzirki wagtda «Al-Haldia» toparynda şikes sebäpli oýundan galan futbolçy ýok, düzüm doly we ähli oýunçylar meýdança çykmaga taýýar. Ol duşuşykdan oňyn netije gazanmagy maksat edinýändiklerini nygtady.
AFK-2 Çempionlar ligasynyň bu möhüm duşuşygy 24-nji dekabrda ýerli wagt bilen sagat 21:00-da Türkmenistanyň Arkadag şäherindäki stadionda geçiriler. Bu oýun diňe bir «Al-Haldia» üçin däl, eýsem Türkmenistanyň «Arkadag» topary üçin hem indiki tapgyra çykmak babatda aýratyn ähmiýete eýedir.
Häzirki ýagdaýda toparçada Kataryň «Al-Ahli» kluby 7 utuk bilen öňde barýar. «Al-Haldia» 6 utuk bilen ikinji orny eýeleýär, Özbegistanyň «Andižan» topary 5 utuk bilen üçünji ýerde, Türkmenistanyň «Arkadag» kluby bolsa 4 utuk bilen dördünji orunda ýerleşýär.
Düzgüne laýyklykda, toparçadan ilkinji iki orun eýeleri pleý-off tapgyryna çykýar. Şonuň üçin hem dört toparyň hemmesi, şol sanda Türkmenistanyň wekili «Arkadag», indiki tapgyra çykmak mümkinçiligini saklap galýar. Bu ýagdaý duşuşygy ýaryşyň iň aýgytly oýunlarynyň birine öwürýär.
Şeýle hem okanyň
Türkmenistanyň agyr atletika boýunça milli ýygyndysy Hytaýda geçiriljek Dünýä çempionatyna gatnaşar
26 Okt. 08:09Türkmenistanyň agyr atletika boýunça milli ýygyndy topary 2026-njy ýylyň 27-nji oktýabry — 8-nji noýabry aralygynda Hytaýyň Ninbo şäherinde geçiriljek 91-nji Dünýä çempionatynda ýurdumyza wekilçilik eder. Halkara bäsleşikde Türkmenistanyň toparyny 10 sany türgen gorar. Zenanlaryň arasynda Ogulşat Amanowa, Şabnam Kerimbaýewa, Medine Amanowa, Gülälek Kakamyradowa we Anamjan Rustamowa çykyş ederler. Erkekleriň bäsleşiginde bolsa Didarbek Jumabaýew, Bektimur Reýimow, Gaýgysyz Töräýew, Rüstem Annaberdiýew hem-de Şahzadbek Mätýakubow dagylar platforma çykarlar.
Ninbodaky bu Dünýä birinjiligi Halkara agyr atletika federasiýasy (IWF) tarapyndan agram derejeleriniň täze ulgamy kabul edilenden soňky ilkinji iri ýaryş bolup durýar. IWF-niň reformalaryna laýyklykda, öňki 20 agram derejesiniň deregine indi medallar toplumy 16 ugur boýunça — erkekleriň we zenanlaryň hersinde 8 agram derejesinde oýnalar. Şeýle hem Hytaýda geçiriljek bu abraýly bäsleşik 2028-nji ýylda Los-Anjelesde (ABŞ) guraljak tomusky Olimpiýa oýunlaryna saýlama ýaryş hökmünde uly strategik ähmiýete eýedir.
Bellenilmeli zat, Hytaý öz taryhynda eýýäm ikinji gezek agyr atletika boýunça Dünýä çempionatyny kabul edýär; bu ýurtda ilkinji dünýä birinjiligi 1995-nji ýylda geçirilipdi. Türkmen türgenleriniň täze agram derejelerinde görkezjek netijeleri milli sportumyzyň halkara meýdançasyndaky ornuny pugtalandyrmaga we Olimpiýa lisenziýalaryny gazanmaga uly mümkinçilik döreder.
Şeýle hem okanyň
Blitz