Aziýa futbol konfederasiýasy (AFK) 2027-nji ýylda Saud Arabystanynda geçiriljek Aziýa Kubogynyň final tapgyrynyň bije çekişlik dabarasynyň senesiniň üýtgedilendigini resmi taýdan yglan etdi. Ozal meýilleşdirilişi ýaly, bije çekişlik 11-nji aprelde Er-Riýad şäherinde geçirilmelidi. Emma konfederasiýanyň metbugat gullugynyň habar bermegine görä, ähli gyzyklanýan taraplaryň we wekilleriň doly derejede gatnaşmagyny üpjün etmek maksady bilen, bu çäre başga wagta geçirildi. Täze sene baradaky maglumat goşmaça mälim ediler.

Bu karar sebitde, aýratyn-da Ýakyn Gündogarda emele gelen soňky ýagdaýlar bilen baglylykda kabul edildi. Ýatladyp geçsek, AFK mundan ozal hem Aziýa Çempionlar Ligasynyň birnäçe duşuşyklaryny başga wagta geçirmäge mejbur bolupdy. Şeýle hem, Kataryň milli çempionaty wagtlaýyn togtadylypdy we meýilleşdirilen halkara derejesindäki, hususan-da Argentina bilen Ispaniýanyň arasyndaky "Finalissima" oýny ýatyrylypdy. Dünýä futbol jemgyýetçiligi 2027-nji ýylyň 7-nji ýanwaryndan 5-nji fewraly aralygynda Saud Arabystanynda geçiriljek esasy ýaryşa sabyrsyzlyk bilen garaşýar.

Türkmenistanyň milli ýygyndysy hem bu uly ýaryşa gatnaşmak ugrundaky göreşini örän şowly dowam etdirýär. Röwşen Meredowyň ýolbaşçylygyndaky türkmen futbolçylary 31-nji martda Bangkokyň «Rajamangala» stadionynda Tailandyň ýygyndysy bilen aýgytly duşuşygy geçirerler. Aşgabat wagty bilen 17:30-da başlanjak bu oýun toparçadaky ýeňijini kesgitlemekde uly ähmiýete eýedir. Türkmenistanyň ýygyndysy häzirki wagtda D toparçasynda 12 utuk bilen birinji orunda barýar.

Toparçalaýyn tapgyryň bäşinji tapgyryndan soňra, Türkmenistan we Tailand deň utuk toplasalar-da, özara duşuşygyň netijesi boýunça türkmen futbolçylary öňdeligi saklaýarlar. 2025-nji ýylyň iýunynda Aşgabatda geçirilen oýunda Türkmenistan tailandlylardan 3:1 hasabynda üstün çykypdy. Toparçanyň ýeňijisi Saud Arabystanynda geçiriljek final tapgyryna göni petek alar. Şri-Lanka (6 utuk) we Hytaý Taýbeýi ýaly beýleki garşydaşlar bolsa ýaryşyň yzynda galdylar.