АKŞ-nyň Döwlet sekretarynyň jemgyýetçilik diplomatiýasy boýunça orunbasary Sara B. Rojers ikitaraplaýyn medeni-ynsanperwer we strategik gatnaşyklary has-da berkitmek maksady bilen, Türkmenistana resmi sapar guraldy. Ýokary derejeli amerikan diplomatynyň ýurdumyzdaky resmi iş meýilnamasy türkmen halkynyň milli guwanjy, dünýä taryhynda we medeniýetinde öçmejek yz galdyran behişdi ahalteke atlary bilen tanyşlykdan başlandy.

Amerikan tarapynyň wekilleri türkmen halkynyň atçylyk sungatyndaky baý mirasyna, asyrlarboýy kemala gelen gadymy däp-dessurlaryna we seýisçilik mekdebine ýokary baha berdiler. АКŞ-nyň Türkmenistandaky ilçihanasynyň resmi durmuş ulgamlarynda berilýän habara görä, taraplar bu saparyň netijeleri boýunça iki döwletiň arasyndaky syýasy hem-de medeni-bilim gatnaşyklarynyň täze belentliklere göteriljekdigine ynam bildirýärler.

Sara B. Rojers 2025-nji ýylyň 10-njy oktýabrynda orunbasarlyk wezipesine bellenip, ol halkara derejede bilim we medeni alyş-çalyş maksatnamalaryna hem-de daşary ýurt jemgyýetçiligi bilen özara gatnaşyklara gözegçilik edýär. Onuň Türkmenistana guran sapary 2026-njy ýylyň 27-nji maýy — 10-njy iýuny aralygynda sebit boýunça amala aşyrýan giň gerimli diplomatik taslamasynyň möhüm bölegidir. Bu halkara ýöriş çäklerinde diplomat Hindistany, Nepaly, Özbegistany we Türkmenistany öz içine alýan Günorta hem-de Merkezi Aziýa ýurtlarynda gepleşikleri geçirýär we bu sapar Rojersiň bellenilen wezipesinde Merkezi Aziýa sebitine guraýan ilkinji iri diplomatik çäresidir.