26-njy maýda Türkmenistanyň daşary işler ministri Raşid Meredow BMG-niň Howpsuzlyk Geňeşine başlyklyk edýän Hytaý Halk Respublikasynyň daşary işler ministriniň çakylygy boýunça «BMG-niň Tertipnamasynyň maksatlaryny we ýörelgelerini berjaý etmek» atly ýokary derejeli açyk pikir alyşmalara gatnaşdy. Çykyşyň dowamynda türkmen tarapy sebitde we dünýäde durnuklylygy hem-de ynanyşmak dialogyny berkitmäge gönükdirilen parahatçylyk söýüjilikli daşary syýasat ugrunyň ugurlaryny mälim etdi. Bu barada Türkmenistanyň DIM-iniň metbugat gullugy habar berdi.

Ministr öz çykyşynda türkmen halkynyň Milli Lideri Gahryman Arkadagymyzyň we Prezident Serdar Berdimuhamedowyň öňe süren halkara tekliplerine, şol sanda «Ösüş arkaly parahatçylyk» başlangyjyna aýratyn üns çekdi. Şeýle hem geçen ýylyň awgustynda Awazada guralan BMG-niň Deňze çykalgasy bolmadyk ösüp barýan döwлетler boýunça üçünji maslahatynyň (LLDC-3) netijeleri, kabul edilen Awaza syýasy Jarnamasy we Hereketleriň Awaza maksatnamasynyň ähmiýeti barada durlup geçildi.

Mundan başga-da, döwletleriň arasynda gepleşikleri ileri tutýan «Dialog — parahatçylygyň kepili» filosofiýasynyň wajyplygy ýene bir gezek nygtaldy. Türkmenistanyň başlangyjy bilen BMG tarapyndan 2025-nji ýylyň «Halkara parahatçylyk we ynanyşmak ýyly» diýlip yglan edilmegi bu ugruň dünýä derejesindäki ykrarnamasydyr. Çykyşyň ahyrynda pälwan diplomatlary taýýarlajak Parahatçylyk we bitaraplyk uniwersitetini döretmek, Ählumumy howpsuzlyk strategiýasyny taýýarlamak hem-de 2028-nji ýyly «Halkara hukugy ýyly» diýip yglan etmek baradaky täze taryhy teklipler halkara bileleşiginiň dykgatyna ýetirildi.