Türkmenistanyň Futbol Federasiýasynyň (TFF) resmi maglumatyna görä, 2026-njy ýylyň Ýokary liga oýunlary dört aýlawda geçiriler. Möwsümiň ilkinji tapgyry 4-nji aprelde başlap, 20-nji iýuna çenli dowam eder. Çempionatynyň başlanmagyna sanlyja günler galanda, ýurduň öňdebaryjy klublary öz düzümlerini güýçlendirmek ugrunda iň esasy transferleri amala aşyrdylar.

Balkanabadyň «Nebitçi» topary bu möwsümiň iň uly täzeligine gol goýdy. Geçen möwsümiň iň gowy oýunçysy Elman Tagaýew mundan beýläk «nebitçileriň» hatarynda çykyş eder. Şeýle hem, toparyň düzümi Alibek Abdyrahmanow we Serdar Orazalyýew ýaly tejribeli futbolçylar bilen has-da berkidildi. Ýurduň häzirki çempiony «Arkadag» topary bolsa Daýanç Meredow we Meýlis Diniýew ýaly zehinli oýunçylary öz hataryna goşdy.

Beýleki toparlarda hem wajyp üýtgeşmeler bar: Azat Annaýew «Ahala», Selim Ataýew «Altyn Asyra» geçdi, tejribeli hüjümçi Wahyt Orazsähedow bolsa «Aşgabat» toparynyň düzümini güýçlendirdi. Şeýle-de, üç sany uly klub möwsüme täze baş tälimçiler bilen gadam basýar. «Ahal», «Şagadam» we «Merw» toparlary täze hünärmenleriň ýolbaşçylygynda ýokary netijeler ugrunda göreşerleri.

Futbol janköýerleri aprel aýynda başlanjak gyzykly bäsleşiklere sabyrsyzlyk bilen garaşýarlar. Täze düzümler we üýtgeýän tälimçilik usullary bu ýylky çempionatyň has-da çekeleşikli geçjekdiginden habar berýär. Transferleriň doly sanawy we oýunlaryň tertibi baradaky has jikme-jik maglumatlary federasiýanyň resmi internet sahypasyndan tapyp bilersiňiz.