Amerikanyň Birleşen Ştatlarynyň paýtagty Waşington şäherinde Türkmenistanyň daşary işler ministri Raşid Meredow bilen ABŞ-nyň Döwlet sekretarynyň orunbasary Kristofer Landaunyň arasynda resmi gepleşikler geçirildi. Daşary syýasat edarasynyň maglumatlaryna görä, duşuşygyň dowamynda taraplar strategik wezipeleri çözmekde döwletara gatnaşyklaryň strategik ugurlaryna seretdiler. Hünärmenler syýasy-diplomatik, söwda-ykdysady, ylym-bilim we medeni-ynsanperwer ulgamlarda ikitaraplaýyn hyzmatdaşlygy has-da giňeltmegiň anyk şertlerini ara alyp maslahatlaşdylar.

Diplomatlar geçen hasabat döwrüniň dowamynda amala aşyrylan «C5+1» formatyndaky ýokary derejeli duşuşygyň hem-de iki ýurduň Prezidentleriniň arasynda guralan gepleşikleriň taryhy ähmiýetini aýratyn bellediler. Bu geçirilen çäreleriň we gazanylan ylalaşyklaryň Aşgabat we Waşington arasyndaky syýasy hyzmatdaşlyga täze many-mazmun berendigi we strategik taýdan ýokary derejä çykarandygy bellenildi. Taraplar ýokary derejedäki dialogyň netijeli häsiýete eýedigini kanagatlanma bilen tassykladylar.

Ykdysady gatnaşyklary çykarmak we ABŞ-nyň iri işewür toparlarynyň maýa goýum proýektlerine gatnaşmagyny üpjün etmek meseleleri gepleşikleriň esasy bölegini düzdi. Şunlukda, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Amerikanyň Birleşen Ştatlaryna guran saparynyň hem-de şol saparyň çäklerinde ABŞ-nyň öňdebaryjy kompaniýalarynyň ýolbaşçylary bilen geçiren duşuşyklarynyň ykdysady gatnaşyklara kuwwat berendigi bellenildi.

Mundan başga-da, taraplar ýakyn wagtda guralmagy meýilleşdirilýän birnäçe bilelikdäki çäreleriň guramaçylyk meseleleri boýunça pikir alşyldylar. Hususan-da, ABŞ–Türkmenistan işewürler geňeşiniň wekilleriniň ýurdumyza gurajak saparyna hem-de Aşgabat şäherinde geçiriljek nobatdaky her ýylky ikitaraplaýyn syýasy geňeşmelere taýýarlyk görmegiň çärelerine seredildi. Duşuşygyň ahyrynda taraplar özara bähbitli we uzak möhletli hyzmatdaşlygy berkitmek üçin durnukly aragatnaşygy dowam etdirmäge taýýardyklaryny tassykladylar.