Türkmenistanyň Demokratik partiýasynyň ýolbaşçysy Ata Serdarowyň baştutanlygyndaky wekiliýetiň Ýaponiýa guran iş sapary ikitaraplaýyn hyzmatdaşlygy ösdürmekde möhüm tapgyr boldy. Saparyň çäklerinde geçirilen gepleşikler Ýaponiýanyň Liberal-demokratik partiýasynyň ýokary derejeli ýolbaşçylary Taro Aso we Şýuniçi Suzuki, şeýle hem hökümet wezipelileri bilen guraldy. Duşuşyklarda iki döwletiň arasyndaky syýasy dialogy halkara ülňülere laýyklykda has-da kämilleşdirmek barada pikir alşyldy.

Gepleşikleriň esasy ugurlarynyň biri iki ýurduň öňdebaryjy syýasy guramalarynyň arasynda göni gatnaşyklary ýola goýmak meselesi boldy. Türkmenistanyň Demokratik partiýasy bilen Ýaponiýanyň Liberal-demokratik partiýasynyň arasynda ýörite hyzmatdaşlyk mehanizmini döretmek baradaky teklip tarapyndan doly goldanyldy. Bularyň hemmesi döwlet Baştutanlarynyň gatnaşmagynda öň Tokioda geçirilen ýokary derejeli duşuşyklarda gazanylan ylalaşyklary durmuşa geçirmäge ýardam eder.

Parlamentara hyzmatdaşlygyň çäklerinde geljekde amala aşyryljak anyk taslamalara we çärelere seredildi. Hususan-da, taraplar «Merkezi Aziýa + Ýaponiýa» dialogynyň Parlament forumyny Aşgabat şäherinde guramak baradaky meýilnamany ara alyp maslahatlaşdylar. Şeýle hem zenan parlamentarileriň arasyndaky hyzmatdaşlygy ösdürmek, kanun çykaryjylyk we ylmy-bilim ugurlarynda tejribe alyşmak ulgamlaryny işjeňleşdirmek boýunça ylalaşyk gazanyldy.

Mundan başga-da, türkmen-ýapon gatnaşyklarynyň ykdysady we innowasion ugurlaryna, esasan hem nebitgaz hem-de himiýa senagatyndaky bilelikdäki taslamalara seredildi. Ýaponiýanyň ösen tehnologiýalaryny ýurduň önümçilik pudaklaryna ornaşdyrmagyň netijeli nusgalary barada bellenip geçildi. Iş saparynyň netijeleri boýunça taraplar köpugurly strategik gatnaşyklary we däp bolan dostluk köprülerini mundan beýläk-de berkitmäge taýýardyklaryny tassykladylar.