Aşgabat şäherindäki «Arçabil» myhmanhanasynda Türkmenistanyň hem-de Hytaý Halk Respublikasynyň wekilleriniň gatnaşmagynda oba hojalyk pudagyny ösdürmäge bagyşlanan duşuşyk geçirildi. Bu ugurdaky Gepleşikler Hytaýyň Sinszýan-Uýgur awtonom raýonynyň Halk hökümetiniň başlygy Erkin Tuniýazyň ýolbaşçylygyndaky wekiliýetiň ýurdumyza bolan saparynyň çäklerinde guraldy.

Çärede iki ýurduň agrosenagat toplumynyň ýolbaşçylary, ylmy edaralaryň alymlary we iri kompaniýalaryň hünärmenleri bir ýere jemlendi. Duşuşygyň dowamynda taraplar oba hojalygynda innowasion we sanly ulgamlary ornaşdyrmak, tohumçylyk ile seçgi işlerini kämilleşdirmek barada pikir alyşdylar. Şeýle hem pagtaçylyk, çig maly gaýtadan işlemek we suw serişdelerini tygşytly ulanmak meselelerine aýratyn üns berildi.

Hytaý tarapy oba hojalyk ulgamynda bilelikdäki maýa goýum taslamalaryny durmuşa geçirmäge hem-de Türkmenistana döwrebap tehnikalary getirmäge gyzyklanma bildirdi. Mundan başga-da, taraplar hünär tejribesini artdyrmak maksady bilen iki ýurduň oba hojalyk bilermenleriniň özara saparlaryny yzygiderli guramak barada ylalaşdylar.

Saparyň jemleri boýunça hytaý wekiliýeti Türkmenistanyň Ministrler Kabinetiniň Başlygynyň orunbasary T.Atahallyýew bilen duşuşyk geçirdi. Duşuşykda geçirilen geňeşmeleriň netijeleri jemlenip, taraplaryň sebitara agrosenagat gatnaşyklaryny we tehniki hyzmatdaşlygy täze derejä çykarmaga taýýardygy bellenildi.