Türkmenistandan bolan Alp Arslan Begenjow 20 ýaşa çenli türgenleriň arasynda geçiriljek erkin göreş boýunça dünýä çempionatynda ýeňşe esasy dalaşgärleriň biri hökmünde görkezilýär. Bu halkara ýaryş 17-nji awgustda Bolgariýanyň Samokow şäherinde başlar diýip, Bütindünýä göreş birleşiginiň (UWW) resmi saýtynda habar berilýär.

Aşgabatdan bolan 19 ýaşyndaky türgen 79 kilogram agram derejesinde çykyş edip, geçen ýylda gazanan çempionlyk adyny goramak üçin ýaryşa gatnaşar. 2024-nji ýylda Ispaniýanyň Pontewedra şäherinde geçirilen ýaryşda Begenjow ähli bäş tutluşygy 46:0 hasap bilen ýeňip, garşydaşlaryna hiç bir utuk bermän, Türkmenistanyň taryhynda ilkinji ýaşlar dünýä çempiony boldy.

UWW-niň berýän maglumatyna görä, 79 kg agram derejesi häzirki çempion Begenjowa garamazdan, entek doly açyk hasaplanýar. Bilermenleriň pikiriçe, onuň soňky çykyşlary durnuksyz bolup, bu bolsa beýleki türgenlere ýeňiş gazanmak üçin mümkinçilik döredýär.

Begenjowyň esasy garşydaşlarynyň hatarynda geçen ýyl ilkinji göreşde oňa ýeňlen, emma soňlugy bilen uly üstünlik gazanan Eýrandan Mahdi Ýusufi bar. Ol uly ýaşlylaryň arasynda Aziýa çempiony boldy we 23 ýaşa çenli dünýä çempiony adyny gazandy.

Şeýle-de, Braziliýaly Leandro Araujo (geçen ýylyň bürünç medal eýesi), Amerikaly Uilýam Henkel, Ýewropa ýaşlar çempiony, Gürjistandan Dawit Çeçelaşwili we kontinental ýaryşyň kümüş medal gazanan Azerbaýjanly Muradhan Omarow hem medallara dalaş etjek türgenleriň arasynda.