Türkmenistanyň ýaşlar milli topary Koreýa Respublikasynyň Inçhon şäherinde geçirilen «FIRST Global Challenge 2026» robototehnika boýunça dünýä çempionatynda uly üstünlik gazandy. Dünýäniň 185 döwletinden gelen toparlaryň arasynda geçirilen bäsleşikde türkmen okuwçylary «Skills Challenge» Ugry boýunça kümüş medala, «Winning Alliance» ugry boýunça bolsa bürünç medala mynasyp boldular. Bu dabaraly çempionat her ýyl Olimpiýa oýunlarynyň görnüşinde geçirilip, bilimli ýaşlary bir ýere jemleýär.

Ýurdumyzyň adyndan gatnaşan milli topara Arkadag şäheriniň 1-nji ýöriteleşdirilen okuw-terbiýeçilik toplumynyň mugallymy Myrat Sähetgulyýew ham-da Oguz han adyndaky Inžener-tehnologiýalar uniwersitetiniň talyby Dawut Gurbanow tälim berdi. Toparyň düzüminde Aşgabat şäherindäki 97-nji orta mekdebiň okuwçylary Suhan Nowbatow, Oraznyýaz Rejepow, Aznawur Çolukow, Daýhan Gurbanow we Arslan Babajyýew ýokary taýýarlyk hem-de ussatlyk derejesini görkezdiler.

Bäsleşigiň çäklerinde Türkmenistanyň ýygyndy topary 295 bal toplaýyp, çempionatyň ýarym finalyna çykmagy başardy. Bu ýylky bäsleşigiň esasy temasy tebigatda döreýän ýangynlara garşy göreşmekde innowasion we tehnologik çözgütleri işläp düzmäge bagyşlandy. Türkmen ýaşlarynyň proýektirlemegi we taýýarlamagy başaran robotik ulgamlary emin agzalary tarapyndan ýokary baha eýe boldy.

Toparyň tälimçileriniň bellemegine görä, halkara meýdançasynda gazanylan bu uly ýeňiş ýaşlaryň inženerçilik hünärlerine, innowasion tehnologiýalara we robototehnika bolan höwesini has-da artdyrar. Şeýle hem ol milli bilim ulgamynyň halkara derejesinde barha özgerýändigini hem-de döwrebaplaşýandygyny aýdyň subut edýär.