Türkmenistanly alym-etnograflar Altaý ülkesiniň we Altaý Respublikasynyň çäginde gözbaş alýan «Uly Altaý: türki miras» atly giň gerimli halkara etnografik ekspedisiýasyna goşuldylar. Gorno-altaisk.info neşiriniň habar bermegine görä, Altaý döwlet uniwersitetiniň «Uly Altaý» altaistik we türkologiýa ylym-bilim merkeziniň barlag toparyna Türkmenistandan, Gyrgyzystandandan, Täjigistandan, Özbegistandan we Russiýadan gelen alymlar girdiler. Ekspedisiýanyň bilelikdäki guramaçysy hökmünde Gorno-Altaý döwlet uniwersiteti çykyş edýär.

Ylmy gözlegleriň çäklerinde etnograflar ýerli etnik bileleşikleriň — kumandinleriň, çelkanslaryň, tubalarlaryň, altaýlylaryň we telengitleriň medeni mirasy, durmuşy hem-de däp-dessurlary bilen jikme-jik tanyşarlar. Barlag toparynyň ugry Biýsk şäherinden başlap, soňra Altaý Respublikasynyň Turoçak, Ust-Kan we Ust-Kosa etraplaryndaky az sanly ilatly ýaşaýyş punktlary boýunça dowam eder.

Ekspedisiýanyň ýolbaşçysy Iwan Nazarowyň bellemegine görä, taslamanyň esasy maksady Merkezi Aziýanyň türki halklarynyň taryhy köklerini hem-de olaryň köpötümli medeni Baglanyşyklaryny yzarlamakdan ybaratdyr. Etnografik gözlegler hojalyk ýöretmek, bina gurluşygy, milli geyimler, taýýarlanýan tagamlar, jemgyýetçilik we garyndaşlyk gatnaşyklary ýaly ugurlary öz içine alýar. 2026-njy ýyldaky ekspedisiýa bäş ýurduň wekillerini birleşdirip, özüniň iň giň köp milletli düzümine eýe boldy.