Tatarystanyň paýtagtynda geçirilýän «Russiýa – Yslam dünýäsi: KazanForum 2026» XVII halkara ykdysady forumynyň çäklerinde «Modest Fashion Day» atly ýöriteleşdirilen moda çäresi guraldy. Bu halkara platforma dünýäniň dürli künjeklerinden, şol sanda Günorta-Gündogar Aziýa we Merkezi Aziýa ýurtlaryndan gelýän dizaýnerleriň gatnaşmagynda pudagyň täze meýillerini ara alyp maslahatlaşmaga şert döretdi.

Türkmenistana bu forumda «Miras» moda öýi wekilçilik edip, özboluşly lybaslar toplumyny köpçülige hödürledi. Görkezilişde esasy üns halkymyzyň köpasyrlyk amaly-haşam sungatynyň döwrebap dizaýn çözgütleri bilen utgaşdyrylmagyna berildi. Milli nagyşlar we elde çekilen keşdeler bilen bezelen zenan lybaslary türkmen medeni mirsynyň estetikasyny halkara derejesinde tassyklady.

Çäräniň maksatnamasy diňe bir däp bolan görnüşler bilen çäklenmän, eýsem erkekler we zenanlar üçin niýetlenen erkin biçüwli, nepis we amatly geýimleriň täze nusgalaryny hem öz içine aldy. Dizaýnerler öz işlerinde etniki äheňleri, şol sanda matalary bezemegiň gadymy usullaryny we häzirki zaman tikinçilik tehnologiýalaryny ussatlyk bilen birleşdirdiler. Bu bolsa dizaýnerleriň arasynda tejribe alyşmaga we täze gatnaşyklary ýola goýmaga giň mümkinçilik açdy.

Resmi wekilleriň we halkara bilermenleriň bellemegine görä, bu festiwal asylly modanyň diňe bir belli bir sebit bilen çäklenmeýändigini, eýsem global derejede medeniýetara dialogy ösdürýändigini subut edýär. «KazanForum» meýdançasynda geçirilýän bu çäre dizaýnerler üçin öz önümlerini dünýä bazaryna çykarmakda we medeni aýratynlyklary global moda pudagyna ornaşdyrmakda möhüm orun eýeleýär.