Azerbaýjanyň paýtagty Baku şäheriniň «Circus Sea Breeze» sirk toplumynda Türkmenistanyň meşhur «Galkynyş» milli at üstündäki oýunlar toparynyň, şeýle-de Türkmenistanyň Döwlet sirkiniň we Arkadag şäheriniň Görogly adyndaky Döwlet atçylyk sirkiniň artistleriniň bilelikdäki çykyşlary tomaşaçylarda ýatdan çykmajak täsir galdyrdy. Bu medeni çäre iki doganlyk halkyň arasyndaky dostlukly gatnaşyklaryň çuňlaşmagyna hyzmat edýär.

Sirk arenasynda görkezilen çykyşlarda türkmen artistleri özleriniň ýokary ussatlygyny hem-de milli atçylyk sungatynyň inçe tilsimlerini tomaşaçylara ýetirdiler. Ahalteke bedewleriniň üstünde ýerine ýetirilen çylşyrymly akrobatik hereketler, jigitçilik sungatynyň ajaýyp nusgalary we adamyň hem-de bedewiň arasyndaky sazlaşykly hereketler tomaşaçylary haýran galdyrdy. Bedewleriň gözelligi we ýyndamlygy tomaşaçylaryň ünsüni özüne çekdi.

Çykyşlaryň dowamynda dürli sirk žanrlarynyň artistleriniň görkezen sanlyklary tomaşany has-da baýlaşdyrdy. Türkmen artistleriniň çykyşlary tomaşaçylar tarapyndan uly höwes we dowamly el çarpyşmalar bilen garşylandy. Bu bolsa türkmen sirk sungatynyň halkara derejesindäki abraýynyň we täsirliliginiň ýokarydygynyň aýdyň subutnamasydyr.

«Circus Sea Breeze» sirk arenasyndaky bu çykyşlar «Galkynyş» toparynyň Azerbaýjandaky iri medeni saparynyň dowamy bolup durýar. Artistleriň ýokary ussatlygy bilen taýýarlanan bu täsirli çykyşlary 30-njy marta çenli giň tomaşaçylar köpçüligine hödürlemäge garaşylýar. Ýakyn günlerde hem türkmen artistleri özleriniň täze tärleri we çykyşlary bilen tomaşaçylary begendirmegi dowam etdirerler.